Reiek: Best Tourism Village

Reiek khua chuan “Best Tourism Village of India 2023” a dawng a, Mizoram tihmingthatu Reiek khaw mipuite an fakawmin an chhuanawm takzet. Chutih rualin Mizoram Tourism department lam pawhin fak an phu a, mipui leh sawrkar thawhhona tha tak a awm tih a lang a, Mizoramin hmasawnna hmel thar a hmu a tih theih awm e.
India ram zau takah hian ‘Best’ nihna neih hi thil awlai a ni hauh lo va, elpui tur an tamzia pawh hriat sa a ni. A ‘ber’ hauh tur chuan paltlang tur criteria tam tak a awm tih pawh tlang hriat a ni a; ralkhat atang ringawta duh duh dana a thu-a report liam mai a ni lovang tih pawh a rinawm. Tehkhawng (criteria) hrang hrang chi kua paltlang vek hnua India rama ‘a ber’ han hauh nalh theih hi chapopui ni lovin inchhuanna tham a ni.
Hetih rual hian, ngaihthaa duhtawk mai tur kan ni lo va, ‘best’ nihna kan lak mai avang hian a enga kima tha ber kan ni dawn lo tih hi kan hriat a pawimawh a. Criteria thenkhatah chuan keini aia tha leh mawi leh sâng an awm fur dawn tih pawh a hriat; criteria hrang hrang belhkhawm hnua point hmu sang ber kan nih vanga he ‘Best’ hi hlawhchhuak mai kan ni; sawi nepna erawh a ni lo.
Reiek khua hi faina lamah pawh hriat hlawh khawpa hma la tha an ni chungin, tun tuma criteria-ah hian faina lam hi a la tel lo zawk lehnghal a. Criteria-te hi: cultural and natural resources; economic sustainability; environmental sustainability; governance and prioritization of tourism; healh, safety and security; promotion and conservation of culture; development of social sustainability; tourism development and value chain integration; Infrastructure and connectivity, te a ni.
Tun hnaiah tourist thenkhatin Reiek an tlawhna video youtube lamah an dah thin a, riah chilhte pawh an awm a; mahse, tourist guide lam hi hmuh tur an awm meuh lo thin a; Mizo typical village an han tlawh ve a, hrilhfiahtu an awm mumal thin loh avangin an thlir liam vel mai mai a. Tourism destination kan neih that ber hi tun aia kan thuam that chu a ngai hle tih a lang.