ZD Lalvunga
Inremna tih sawi hi chuan, a kawng bumbohzia tarlan a chakawm rualin, tunah chuan, MNF/MNA-te inremna kawng zawh hun chhung hi kum 10 chhung zet a nih avangin Mizo National Army, Hqrs./Capital-a awm te chuan, Inremna chu beisei dan pawh an hre seng tawh lova. Inremna kha lo fail/hlawhchham pawh nise, buai lo turin kawng tinrengah hma an la nasa hle a ni. Leilet Zau tak te siam tawhin, Bawngchal engemawzat nen an let vut vut a. Sipai Section khat, fel theh thawh an Officer hovin an riak reng thin a ni.
Hetih lai pawh hian Sipai Training chi hrang hrang neih a ni reng bawk a. Khatia Inremna lam hawi lo leh tum lo ang maia an awm chhan kha, Inbiakna kha a fail/hlawhchham zing tawh lutuk a, MNF/MNA te khan beisei dan pawh an thiam seng tawh bik lo a ni ber mai.
Heitang inbuatsaihna hrang hrangin hma la mah se, Ningani (Thursday) apiangin tawngtai inkhawm an nei ziah thin a ni. Hemi zan hi chu Inkhawm hun dang aiin ngaih pawimawh a hlawh bik a ni. Chuta |awngtai thupui ber chu “Lalpa, Zorama Remna kan nghah hi, MNF duh dan emaw, India duh dan emaw ni lovin, Nangma duh dan leh remtihna ni zawk rawh se” tih a ni ber. Hei hi an hmuhdan leh duh dan pawh a ni reng a. 1984 kum kha hrehawm an ti hle a, Inremna kha awm mai tura beiseiin an inthlahdul deuh va, Inremna kha a awm mai si lova, ei leh barah an buai phah hle a ni.
Rilru-a beisei phak tawh loh hnuah, Remna rim a nam ta a. AIR Aizawl Station in “Hla thlan” Programme-ah (Arakan)-ah Zan dar 10 a ni. June 29th 1986 zan laiah India leh MNF ten Inremna an ziak fel dawn a, TV-ah en theih a ni ang” tih a rawn puan kha, Hnam Sipai “L” Battalion (Lalvunga Bn) ten an lo ngaithla fuh hlauh mai a, ‘L’ Bn ho hi an khua a har deuh thin avangin AIR Aizawl hi fiah mang lo chung pawhin an ngaithla hram hram thin a ni. Khami zan ber kher kha chu, Battalion dang Radio herh/set an lo awm lova, Lalvunga Bn. te chu tute mah mu lovin Remna Sign tur chu an lo nghak ve tawp mai chu lo niin, puan lawk ang chuan, 30th June 1986 zan laiah chuan Remna chu Signed fel a lo ni ta a ni. ‘L’ Battalion ho chu tu mah mu lovin Silai te an kap a, rithei ang ang te khawng riin, an lo hlim nasa mai a lo ni.
Capital lam chuan engmah an lo hre ve lova, Hnam Sipai Roll Call-ah pawh Hnathawh tur leh thawh dan tur te ruahman fel vek a ni. “L” Battalion hotu Lt. Col. Malsawma chuan zing takah Sipai tirin, Capital lam chu chanchin a hrilh ta a. Tichuan, an lo hre ve ta chauh a ni. Chutia Remna Signed tih an hriat chuan, Vice President Pu Zorama chenna In-ah an tlan khawm a, an inchibai ve nak nak a, an lo tih dan thin angin tlachawp ro an rel ta a ni.
Dt. 30th June 1986 hi Remna Ni a nih angin, Hnam Sipai hmun tinah Sorkar (Underground/Provisional Gov’t of Mizoram) chuan chawlh a puang a. Mahni hmun theuhvah, “Pathian hnena lawmthu sawi ni rawh se” tiin order siam nghal a ni.
Capital-ah chuan, Hall-ah tawngtai inkhawm urhsun taka neih a nih hnuin, Infiamna chi hrang hrang nen nilengin intihhlimna neih a ni a. Cabinet Team leh Army Chief Team ten football an khel a. A hma atanga incho tawhin an inchona a rei tawh bawk a, Cabinet Team chu Pu Zoramthangan a ho va, Army lam chu Pu Tawnluian a ho ve thung a. An han inkhel zet mai chu an nasa mai mai a sin aw!!… Army lam chuan Pre-plan-an lo nei a ni awm e.
Hun chanve hnu lawkah, Col. Pu Nohranga ball khalh chu, Minister Pu Rinchhana’n a chuh a, chu veleh Pu Nohranga chu tluin, a biak theih ta hauh loh mai a, Medical lamin an zawn chhuak ta a. An lo ruahman lawk ang ngeiin Pu Nohranga aiah thiam zet mai a lut ta mai a, Inkhel an tan leh chiah chu, an zawnchhuah Pu Nohranga chuan, Nui chungin “Tikha chuan kan chak tawh ngei ang” a ti ta mai a. An hawihai hle hlawm a ni awm e.
Tichuan Remna Ni chu Capital-ah chuan hmang ve mah se, a awmzia chu hriat chianna tak an nei lem lo. Kar khat hnu velah Remna Palai Pu Rualchhina chuan Capital a rawn thleng ve hlawl mai a, chuta tang chuan thil awm dan chu an hre ve ta chauh a ni. Tichuan, Hnam Sipai Battalion tinte Commandant theuh te chu Capital-ah koh khawm an ni a, rem an ruat ta a. “Remna kan nei ta a. Kan chhuah a tul dawn ta si a. Hna kan thawhpui tur te chu min hektu te, min mana min sawisa tute an ni dawn a, tute mahin phuba lakna rilru kan pu tur a ni lo, Remna a nih ang ngeiin mite va remtu kan ni tur a ni,” tih te chu nasa takin an inzirtir a. Chutih rual chuan, ‘kan lungrual thei em? Silai lo chheprelh kan awm mai ang em? tih thlengin an ngaihtuah a ni.
Tichuan, Army chief Order angin Battalion tina silaite chu hmantlak vak loh thlengin an siam tha a, awm dan mawi leh tul ang ang an inzirtir ta bawk a. Tichuan, 21st July 1986 (Monday)-ah an ruahman lawk angin Pu Rualchhina hovin, Nunau chak lo zual, mi tam tak chuan Capital an chhuahsan ta a. Pharva-ah innghakkhawm tura tih a ni.
Kal hmasa ho hi an chhangche hle a, kalkawnga thingluang kan tur pawh, a chung leh hnuai chu, a bel zawng a inang deuh reng a ni awm e. A hmasa ho an kal liam atang chuan, an chhehvel, Mizo Hnahthlak te an lo lang tan ve ta a. An thil neih tam tak Mizorama ken ve theih loh turte chu an thehthang nual a, Japan Siam Buhdeng Khawl leh thil dang pawh, Sial-in an thleng vek a. Heng avang hian pharva thleng chu Sa eitur an nei thei a ni. Hetianga khawchhung mite nen an indawr meuh chuan, an Buhfai neih te pawh ei zawh mai a lo tul ta bawk nen, In khatah mikhual 20/30 nei deuh reng ang an nih chu.
Army Hqrs. lam pawhin an tihtur an ti zo ta a. Silai chi hrang hrang List leh a tak tak a inmil em tih an enfel/checked chuan a lo inmil thlap a, tute mah Silai chheprelh an awm lo tih bakah, Remna atana Hnam Sipai an lungrualzia a lang chiang hle a ni. Tichuan 23rd July 1986 (Nilaini) khan Vice President Pu Zoramthanga hovin Arakan, chhuahsan runpui chu a thleng ta a. Zing dar 10 (Bangladesh Standard Time) ah Capital field-ah chhuak khawm vekin Pu Zoramthanga chuan thusawina neiin, khawchhung mi tam tak te chuan, MNF te Mizoram hawng tur chu, mittui nen thlahin an lung a chhe tlang a ni ber e. Thusawi zawhin Pu Rinchhana chuan Pathian hnena inhlanna tawngtaina neiin, chumi hnu chuan, Hnam Sipaite chu an pianna Zoram pan tur chuan ruahman angin an kal ta a. Khawchhung mi, an kalsan turte chuan anmahni hnam tawngin “Dam takin kal rawh u, Min rawn theihnghilh reng reng suh u, Pathianin min hruaikhawm leh rawh se” tiin mittui nen an inthlah liam ta a ni
Arakan chhuahsan hun lai hi, fur chhe lai tak ni mah se, kal kham khawp buaina awm lovin, MNF/MNA te chuan Pharva an thleng a. Dt. 27th July 1986 chuan, India aiawh leh MNF aiawhte chuan, Ralthuam inhlanna Pharva-ah an nei a. Silai chi hrang hrang leh a mu, Granade leh Pistol etc. MNF te chuan Remna thuthlungin a sawi angin India aiawhte hnenah kim takin an hlan ta vek a ni.
MNA-te silai hi State Armory-ah thleng khawmin heta tang hian, Armed Police Battalion, hrang hrangah sem darh-a dah a ni.
Tichuan, Zoram mipuiin a mamawh tawh si avangin Inremna thuthlung angin, MNF/MNA underground-te chuan rinawm takin engkim an ti a ni tih khawvel hriatah leh mit hmuhah an puang ta a ni.
The Woods are lovely Dark and Deep,
But I have Promises to Keep
And Miles to go before I Sleep