Ri hriatna lama harsatna neite tan camp buatsaih

Ephatha Society of Mizoram for the Deaf and Hard of Hearing leh Ali Yavar Jung National Institute of Speech & Hearing Disabilities (Divyangjan) tangdun buatsaih, Diagnostic & Fitment Camp for Hearing Impaired chu Ephatha Special School Kulikawn West-ah Thawhlehni khan neih a ni a. Beng dar mamawhte hnen sem a ni bawk.
Hmanpuitu larsap Dr Hari Babu Kambhampati chuan mimal thahnemngai leh pawl thenkhat, mi harsa zawkte dikna leh chanvo humhalh tura thawktute chungah lawmthu a sawi a. Ephatha Society chu beng hriatna lama harsatna neite tanpuina kawngah rawngbawlna zahawm tak tak an thawh avangin fakawm a tih thu a sawi. Pianphunga midang phak lote pawhin zahawm tak leh mawihnai taka khawsak an phu vek, tiin, kan chhehvela kan hmelhriat zingah pianphunga harsatna tawk an awm chuan tanpui inhuam tlang turin mitin a chah.
He camp-a thlawp zia lantirnan larsap hian sumfai Rs. 50000 a thawh a. Ephatha Special School Board-in an hmunhma cheithat an duhna pawh sawrkar laipui Ministry of Social Justice & Empowerment-a thlen hmasa tur leh amah pawhin hma lakpui a inhuam thu a sawi a ni.