Riahna, lirthei dahna leh futsal ground awmna tur siam dawn

Dinthar Veng khawtlangin ram an pek leh MINECO-a sawrkar ram hmang telin, lirtheina dahna hmun, riah theihna leh futsal ground awmna ni bawk ‘Smart Parking’ sak a ni dawn a, Thawhlehni khan deputy chief minister Tawnluia’n a lungphum a phum.
‘On road smart parking’ site area hi 3274.6 sq.m. a zau a ni a. Sum sen tura ruahman hi cheng vaibelchhe 13.38 a ni. Contract agreement hi kumin February 11 ah ziah a ni a. 2024 June 30-ah thawh zawh hman tura ruahman a ni. Basement I-ah lirthei ke pali nei 52 leh ke pahnih nei 45, belhkhawmin 97 dah theihna siam a ni anga; basement II ah mikhual thlen theihna dormitory 4 bedded room pahnih, 2 bedded room 2 leh VIP room pakhat a awm ang. A chung berah futsal ground siam a ni dawn a. Hei hi chu Dinthar YMA-in a sak hna leh a sakna senso an tum dawn a ni.
Deputy chief minister chuan bialtu MLA, Dinthar Local Council leh YMA thahnemngaihna, khawtlang mipui leh sawrkar tanrualna avangin he hmalakna hi bul tan a ni dawn tih a sawi a. Aizawl khawpuiin a mamawh em em parking tha tak, Mizoram Secretariat bulhnaiah leh Ebenezer Hospital bulah dah a ni tur chu tangkai taka hman theih hun tur a nghahhlelhawm hle tih sawiin, “Kawrkamah, Tuikual luiin a tantlangna hmunah sak a nih dawn avangin a ruangam pawh uluk taka duan a ni a, a satuten uluk leh fimkhur taka an thawh a ngai dawn a ni,” a ti.
Riahna hmun tha tak, khualbuk anga hman theih tur dah a ni tur chu Ebenezer damdawi ina damlo enkawltuten an hman tangkai a beisei tih a sawi a. Thalai infiammite tan futsal ground dah a ni dawn tih a sawi bawk. Aizawl khawpui chhung hmun hrang hranga sawrkar hmalakna te sawiin, “A bikin Smart City Project hian engemawchen Aizawl khawpui hmel a ti danglam dawn a ni,” a ti.
Bialtu MLA, minister Lalruatkima pawhin thusawiin Dinthar khawtlangin he project a puitlin theih nan thlanmual ram zau tak an satthla a, sawrkar ram MINECO huamchhungah GAD-in ram zau tak a pe bawk a, an chungah a lawm takzet tih a sawi. He project hi a hun takah tha taka thawh zawh a nih a, veng mipui leh a mamawh apiangten tangkai taka an hman a beisei tih a sawi bawk.