Ronaldo-a’n social media-ah follower 1B nei tling

Ronaldo-a’n social media-ah follower 1B nei tling
Football superstar Cristiano Ronaldo chuan field pawn lamah pawh record a siam belh zel a, hmanni lawk khan Al Nassr striker hian UEFA Nations League match-ah a career goal 900-na a khung kha a ni a, tunah chuan social media platform hrang hranga a follower neih belhkhawm chu tluklehdingawn a tling leh ta!
Follower tluklehdingawn a nei tling hi amah pawh a phur khawp mai, X-ah “History kan siam e – Follower tluklehdingawn khat! Hei hi chu number a ni satliah mai lo – kan tui zawng inanna leh game kan hmangaihna leh a piahlam thil a ni,” a ti a, “Madeira khawlai atangin khawvela stage lian ber berah kan inhlangkai a, ka chhungte leh nangmahni tan ka inkhel thin, tunah chuan mi tluklehdingawn khat kan tangho ta. He zinkawng hi kan zawhho a, kan theihnain tawpchin a nei lo tih kan lantir a ni,” tiin a post.
Ronaldo hian Instagram-ah follower maktaduai 600 a nei a, X-ah maktaduai 500 neiin, Facebook-ah maktaduai 170 leh YouTube-ah subscriber maktaduai 60 a nei tawh a ni.
Ronaldo chuan a lawmthusawi khar nan, “Ka laka rinna innghah avang te, min support-na leh ka nuna intel ve avangin in ka lawm e. Thil tha zawk a la thleng dawn chauh, kan tang zel ang a, kan chak zel ang a, history kan siamho zel ang chu,” a ti bawk.