Rooftop Solar Scheme leh Mizoram

Tun hnai khan Rooftop Solar scheme (PM-SGMBY) kalpui tha ‘Top Performing North East State’ lawmman chu Mizoram (P&E deptt) hnenah hlan a ni a. Hetiang lawmman dawng theia kan awm hi a lawmawm hle.
Electricity power siam chhuah lamah Mizoram hi kan hnufual hle a, kawlphetha kan mamawh zatve pawh kan la thar chhuak thei lova, sum tam tak sengin thenawm state atangin power kan lei reng a, hei hian hma kan sawn tur ang pawhin hma min sawntir thei lo a ni.
Tuikhuah hmanga power siamchhuahna project kalpui tur hmachhawp a awm nual a, hei hi khuarei thil deuh a la nih avangin, a lo berah kum 10 vel chhung hi chu state dang atangin power hi kan lei a la ngai reng dawn niin a lang.
Power siamchhuah lama intodelh si lo tan hi chuan renewable energy lam hi kan hawi a pawimawh a. Tuna Mizoramin rooftop solar kan uar chho ta pawh hi kan dinhmun nena inhmeh tak a ni a, chutih rualin sum tam tak luangral tur venna tha tak a ni nghal bawk awm e.
Tuna Mizorama solar power plant kan neih – Tlungvel (2MW), Vankal (20MW) leh Saitual (5MW) te hian phai lam atanga power kan chawk luh tur engemaw zat chu a chhawk ve dawn tihna a ni a. Rooftop solar scheme kalpui mek hnuaiah hian, eng ang takin nge power kan lei thin hi a chhawk ve theih tih te pawh hi sawrkar lam hian tarlang thei se a duhawm hle. Lawmman hial kan lak theihna a nih piah lamah, inrenchemna kawnga hmalakna pawimawh tak a ni tel nghal dawn bawk si a.
Tunhma deuh khan sawrkar department office-te chu rooftop solar install tura tih an ni a, mahse beisei angin department lamin an uksak vak lo niin a lang. Sawrkar office-te hian renewable energy lam hi bawh se, power an hmang nasa hlawm si a, rooftop solar hi install vek thei se, office expenditure tih hniamna tha tak, ‘austerity measure’ an tih fo tihhlawhtlinna tur pakhat a ni dawn a, chu chu tuikhuah siam kher lova power dehchhuahna kawng awlsam tak pakhat a ni mai dawn a ni.