Rualbanlote dawmkan kawnga thawk thate chawimawina “State Award for the Welfare of Persons with Disabilities” chu Spastic Society of Mizoram dintu Chhingpuii leh mitdelten zirna lama hma an sawn theihna atana hma latu commissioner Lalkiamlova te hnenah hlan a ni.
-- Advertisement --
Thawhtanni khan chief minister Zoramthanga chuan he chawimawina hi a hlan a. He state award pekchhuah hi a tumkhatna niin, Commisioner for Persons with Disabilities office leh Mizoram Rural Bank tangdun buatsaih a ni.
Chief minister chuan chawimawina dawngtute leh a buatsaihtute chungah lawmthu sawiin, “Thil hrang hrangah state huap chawimawina tam tak pekchhuah a ni tawh thin a, vawiina state award sem hi thil tih awm tak a ni a, mi hriat lar loha thahnemngai taka lo thawkte an fakawm a ni,” a ti. Persons with Disabilities kan tihte chu an harsatna neih ang nei ve lote ang bawka hlawhtlinna nei thei an ni, tiin, chutiang tur chuan puihna leh indawmkan erawh a tul thin a, hetiang kawnga thawktute fak an phu hle tih a sawi.
Spastic Society of Mizoram (Society for Rehabilitation of Spastic Children) dintu zing ami Chhingpuii hian rualbanlote tanpui dan tur chi hrang paruk vel a ziak a; NIEPID Secunderabad siam rualbanlo chungchang thu chi hrang hrang, brochures 10 chuang Mizo tawngin a lehlinsak. Rajiv Gandhi Foundation (RGF) tanpuina in lehkhabu chi hrang hrang engemawzat Mizo tawngin a let tawh bawk. Ama hmalakna hian RGF hnuaiah rualbanlote tan bik liau liau film pakhat siam a ni tawh a ni. A hmalakna zelin amah leh a thurualpuite chuan hmun hrang hrangah awareness an kalpui thin bawk. Commissioner Lalkiamlova hian mitdel hawrawp (Braille) bakah home management leh anmahni enkawl leh kaihhruai dan a zir a. Kum 1976-a Kalimpongah hna a hmuhin an text book-te Braille a chhutsak a. Mizoramah school tan tur a nih avangin primary school zirlaibu zawng zawng pawh Braille-in a siam nghal vek a ni. January 1977 atangin Kolasibah Mizorama mitdel school hmasa ber a tan a. Official chuan 1977 April 15-a hawn a ni.
School hi “Integrated School” tia leh a ni a, khaw hmutheite leh hmu thei lote chu school khatah zirtirna inang pek an ni. School-a a thawh loh hnu ah pawh mitdel naupangte a buaipui zui a. Sawrkar hna an thawh theihna turin theihtawp a chhuah a ni. Mitdelten anmahni hawrawpa Bible an chhiar theihna’n theihtawp a chhuah a; SCERT thawhpuiin Braille tih changtlunna turin theihtawp a chhuah. Zirlaite tanpui turin ‘English and Mizo Braille Primer’ bu a siamsak bawk.