Rubiales bang ta nge nge

Women’s World Cup final lawmman sem laia Spain forward Jenni Hermoso hmuia a fawh ngawt avangin Spanish FA president Luis Rubiales chuan Spanish Football Federation president a nihna atangin banna a thehlut ta nge nge!
Karliamta Thawhlehni khan kum 33 mi Hermoso hian England an hneh tuma an president-in a fawh kha a remtihna tel lo a nih thu tarlang chungin court-ah thubuai a thehlut a, Rubiales hian bang tura nawrna nasa tak a tawk zui chungin tihsual a neih loh thu leh dik lo taka beih a tawk mai nia sawi chungin ban a tum loh thu a sawi a, mahse, Fifa lam inrawlhin a chungchang chhui a nih chhung atan an ‘suspend’ zui ta tho a, tunah amah, Rubiales ngei pawh a tang zo ta lo a, federation acting president Pedro Rocha hnenah banna a thehlut ta a ni.
Kum 46 mi Spaniard hi Uefa executive committee vice-resident a nihna atang pawhin a inhnuk-dawk fel nghal a, Piers Morgan television show-ah a hna a thawh theih tawh loh thu a hrilh.
Kha kiss case khan World Cup-a Spain champion boruak pawh a khuh hneh hle a; karliamta Zirtawpni khan Thawhlehnia Her-moso thusawi hmangin ukil pakhat chuan Spain high court-ah thubuai a thehlut a, Rubiales chu tihluihna hmanga hmeichhe laka hursualna khawihah hial puh a ni ta!
A tirah Rubiales khan a hmeichhe fawh chu inhriatthiam-tawnna tiin a sawi a, mahse, player ngeiin chutiang engmah a awm loh thu a sawi a, bang tura nawrna nasa tak bakah Fifa leh court meuh a inrawlh chhoh dawn tak avangin banna thehlut lo thei loin an hualchep a ni ber.
A fapa an zimtawt dana lungawi loin Rubiales-a nu lah chuan biak inah chaw a lo nghei rawl vei nen, chu pawh chuan awmzia a nei dawn lo niin a lang.