Ruihhlo chungchangah Central YMA leh Kohhran thalai pawl hrang hrang inkawm

Thawhlehni khan Central YMA Committee Room-ah ruihhlo leh a kaihhnawih chungchangah Central YMA hruaitute leh Mizorama Kohhran hrang hranga thalai pawl hruaitute an inkawm. He hun hi Lalhmachhuana, President, Central YMA-in a kaihruai.
Prof. Malsawmliana, General Secretary, CYMA-in sawi hawnna hun a hmang a, ruihhlo leh a kaihhnawih chungchanga YMA hmalakna leh tun dinhmuna ruihhloin bu a khuar dan te, thalaite dinhmun leh thalai pawl ten hma an lak theih dan turte a sawi. Hemi zawhah hian sawihona hun hman a ni.
Ruihhlo do turin Central YMA kaihhruaia Coordination Committee din ni se tiin an rel a, member atan Kohhran thalai pawl tin aiawh pahnih theuh ruat ni se an ti.
He Coordination Committee hian Harm Reduction leh Supply Reduction lamah theihtawp chhuahin hma a la thin ang.
Inkawmhonaah hian Kohhran thalai pawl hrang hrang – CKTP, Aizawl Area TKP Coordination, General PYD ( Mizoram UPC), SDA Youth Federation, Territorial Salvation Army Youth, LIKBKTP, Aizawl Diocese Thalai Pawl, ECM Thalai Pawl atangin hruaitu 36 an kal a, Central YMA atangin 20 vel an tel bawk.