Ruihhlo do beihpui thlak hnuah ruihhlo man a sang
Ruihhlo do beihpui thlak
hnuah ruihhlo man a sang
Mizoram sawrkarin ruihhlo do beihpui thlaka ruihhlo lo luhna Myanmar ramri lam uluk zawka a ven hnu ah tualchhungah ruihhlo veivak a tlem a, a man pawh let dawnin a sang tih sawi a ni.
Mizoram Police hotute sawi danin, Mizoram chhungah ruihhlo veivak a pun nasat avanga sawrkarin ruihhlo do beihpui “Operation Against Trafficking and Use of Drugs and Narcotics” a thlak chu ngawrh taka kalpui zel a ni a. Kumin September 1 atanga kalpui tanah hian Myanmar ramria inkalpawhna leh ramri dep khuate ngaihpawimawh hmasak niin, ramri kana ruihhlo lo lut thin dang chat tura beih a ni a; tualchhungah pawh ngawrh takin ruihhlo dap leh a tawlhte chhuichhuah hna thawh a ni.
Excise & Narcotics Department, Special Narcotics Police Station leh Central YMA atanga thu an dawn danin, tualchhunga ruihhlo lengvel a tlahniamin ruihhlo zuar an tawmim tan nia hriat a ni tih Police hotute chuan sawiin, khawlaia heroin hawng khat man Rs. 25000 vel ni thin pawh tunah hian Rs. 40000 vel a kai niin hriat a ni a, ruihhlo zuar leh tawlhruk chingte tan chet a har chho a, hei hian rah tha a chhuah zel an beisei tih an sawi.
Ruihhlo do beihpui thlak hi thla li chhung, 2025 September – December thleng kalpui phawt tum a ni a, tun aia a lo hlawhtlin lehzual theihnan thawhpui turin mipui an ngen tih Mizoram Police hotute chuan an sawi.
“Kan ram leh hnam venhimna tura sawrkar, VC, YMA leh NGO hrang hrang tanghoin ruihhlo do beihpui kan thlak mekah hian, neitu chan changa kan hnam hmelma lian tak hi min dopui turin Zoram mipui kan sawm a. Thuneitute hnena misual leh ruihhlo tawlh report kawngah tan la thar a, thahnemngai taka theihtawp min chhuahpui zel turin kan inngen a ni,” an ti.
Ruihhlo do beihpui thlak chin, September 1 atanga October 20 thleng khan Mizoram Police-in:
8 Heroin kg.12.881 an man tawh a, case 38 ziahluh niin, a inhnamhnawih mihring 54 an man a, heng zinga 13 hi ramdang mi an ni.
8 Methamphetamine kg. 101.642 manin thubuai 10 ziahluhah inhnamhnawih mi 14 man an ni a, heng zinga pakhat hi ramdangmi a ni.
8 Crystal Meth kg. 0.096 an man tawh bawk a, thubuai 1 ziaklutin Mizoram mi pahnih an inhnamhnawih a ni.
8 Phai lam atanga lak thin Alprazolam kg. 4.740 chu Myanmar lama lakluh tum nia hriat man a ni a, a inhnamhnawih hnamdang mi 1 man a ni.
8 A vaiin ruihhlo kaihhnawihah thubuai 50 ziaklut tawhin a inhnamhnawih Mizoram mi 56 leh ramdang mi 15, an vaiin mi 71 man an ni tawh.