Ruihhlo ngai enkawlna pui

International Day Against Drug Abuse & Illicit Trafficking 2024 pualin Nilaini khan Lawngtlai district bawrhsap Cheemala Siva Gopal Reddy ruahmannain Lawngtlaia ruihhlo ngaite enkawlna hmun pahnih – Gilead Drop-In Centre leh Lairam Rescue Centre ah tanpuina hlan a ni.
Social Welfare department hnuaia Ruihhlo Do Fund atangin Gilead Drop-In Centre (GDC) tan Rs. 5000 leh Lairam Rescue Centre (LRC) tan Rs. 10000 chu thawktute kutah an hlan a. GDC hi MHIP Lawngtlai Core Composite hnuaia kalpui niin, harsatna khirh khan zawk leh natna tha lo laka ruihhlo ngaite leh inzuar thinte an him theih nan leh rilru leh taksaa damna an chan theih nan hma lakna kalpui a ni. Tunah hian GDC-a inziaklut IDU (damdawia inchiu thin) mi 487 leh FSW (hmeichhe inzuar thin) mi 79 an awm a. A khat tawkin an thisen leh an hriselna dinhmun endiksak thin an ni. GDC kaltlang hian HIV kai hmuh chhuah IDU 106 leh FSW 18 awm tawhin, tunah hian HIV kai IDU 82 leh FSW 15 an awm a ni.
LRC hi Lairam Isua Krista Baptist Kohhran enkawl niin, Lairam Social Mission hnuaiah kum 2021 November 12 khan din a ni a, 2022 February 11 atangin ruihhlo ngai an enkawl tan. Thawktu 11 awmin, tunah hian enkawl lai mi 12 an nei. Mi pakhat hi thla thum chhung enkawl thinin, a din tirh atangin mi 131 an enkawl tawh a. Khum 30 awm theihna tur building thar luahlut turin an inbuatsaih mek.