Ruihhlo ngaite huangtau ta hi…

Mizoramah ni tin ruihhlo Heroin No. 4 thahnem tak man chhuah a ni ta reng mai a. Tunhma khan kum khat chhunga Heroin man belkhkhawm kha Kg 8 vel a ni thin a; tunah chuan ni khatah Heroin Kg 3/4 te man a ni ta hawlh mai a; ruihhlovin min chiah hneh tawhzia a lang chiang ta hle.
A Kg zawnga a tam chak ang bawkin, ruihhlo ngaite pawh an pung chak tih, chhun pachanga khawlai ualau laia lo inchiu ngawng ngawng hmuh tur an awm ta zut mai atang te, kawngsira ruihhlo zuarte leh ruihhlo ngaite ualau taka lo indawr mawlh mawlh tawk hmuh tur an tam tak dan atangte pawh hian a hriat reng mai. Tunhma kum 20 vel kaltaah kha chuan Heroin No 4 ching thinte kha an awm tih hriat ni mah se, a ruk thei ang bera ti thin an nih avangin hriat leh hmuh tur an inlar zen zen lo. Tuna hetia chhun pachanga kawngsir leh step biru deuh laia ualau taka ruihhlo hmanga lo inchiu ngawng ngawng hmuh tur an tam tak em avang hian, ruihhlovin kan thalaite a bawih nasat tawhzia a lang chiang hle.
Hei hi kan dinhmun a nih tawh avangin, Excise force te pawhin a ruihhlo ai mahin ruihhlo ngai mihring an vai uluk zawk rih a tih theih awm e.
Hetianga ruihhlo ngaite an huangtau sawt ta viau mai hi, kal pelh a, en liam mai mai chi an ni tawh lo a, force lam mite kuta dah ngawt lova, force mite nena thawhhona tur ni tawhin a lang a; khawtlang anga hmalakna tur chi pawh a awm ngei ang.
Hetianga ualau taka khawlaia ruihhlo an tih duh tawh chuan, pawisak an nei tam tawh lo tih a lang a, rukruk mai bakah, chhun enga inrawk leh insuam te pawh a thleng hnai tih a hriat a, naupang leh hmeichhia tan khawlai a raltitawm thuai dawn tih a lang reng a ni.
Chuvangin, thil tha lo zawk a thlen nasat hma hian, ruihhlo ngaite thenfai hna hi force mite nen thawkhoa khawltang anga hmalakna tur chi ngaihtuaha hma lak hi tihmakmawh ni tain a lang.