Ruihhlo zuarte kan do let a hun tawh – CYMA president

Ruihhlo zuartuten kan thalaite thlanmual lamah min thawnliam sak hnem tawh a, kan hnam a boral lohnan kan do let a hun tawh tih Central YMA president R Lalngheta chuan a sawi.
February 20 zana YMA Tlangnuam Vengthar Branch-in YMA Kumpuan ‘Ruihhlo Do’ a hawn a hmanpuinaah R Lalngheta chuan, ruihhlo zuartuten kan thalaite thlanmual lamah min thawnliam sak hnem tawh, tiin, “Kan hnam a boral lohnan kan do let a hun tawh a. Ruihhlo hmanga inti hausate kan endawng ngam a hun a, tlanchhe chunga bei loin huaisen takin kan bei let tawh tur a ni,” a ti.
YMA chu mombati anga mahni ral zel a, mite tana inpekralna a ni thin tih a sawi a. YMA hruaitute chu mi fel ber ber ni kher lo mah se, Pathianin khawtlang enkawl tura a ruat an nih avangin kan tlawmngaihna hian hlutna thuk tak a nei tih a sawi a. YMA chu sakhua leh politics-in a then hran loh, Mizo zawng zawng lenna a nih avangin, YMA a chak apiangin veng a nuam thin tih a sawi bawk.
February 20 zan veka YMA Lengpui Model Branch-in ‘Ruihhlo Do’ kumpuan an hawn hmanpuitu Central YMA general secretary Prof. Malsawmliana chuan, ruihhlo la ti lote venhim kawngah kohhran huangchhunga inzirtir leh chhungkua atanga inzirtir a tul tih a sawi a. Ruihhlo buaipuitute leh a ngawlveite chu chhungkaw inrelbawlna tha loin a nghawng a nih avangin, chhungkaw inrelbawlna kawnga theihtawp chhuah turin a chah. YMA Kumpuan inkaihhruaina in a phut angin, ‘Chhungkaw Zan’ siama inzirtirna hun hmang theuh turin a chah a. Ruihhlo do kawnga che chhuak ve thei lote pawhin ruihhlo dotute tawngtai pui thin turin a chah bawk.