Russia in nuclear doctrine ennawn

Russia chuan lohtheihlohin Moscow chuan a ‘nuclear doctrine’ a ennawn dawn tia sawiin a chhan ber pawh Ukraine indonaah Washington a inrawlh nasat zualzel vang a ni tiin a sawi. Kremlin chuan Ukraine indonaah ‘khawthlang ram te inthurual’ chu demin hei vang hian nuclear doctrine chu ennawn ngai a ni tiin Kremlin thupuangtu Dmitry Peskov chuan a sawi.
Russia in eng tin nge thlak danglam a tum dawi chuang lovin Moscow chuan policy ah thil thlak danglam a ngai tiin a sawi chauh a.
President Vladimir Putin chuan tuna nuclear doctrine a hman mek hi kum li kaltaa a siam kha niin Russia chan nuclear weapons te chu nuclear hmanga beih a tawh emaw Russia tana dinhmun hlauhawma thil a awmin emaw a hmang ang tih a ni.
Tunah erawh Russia chuan collective West te atanga nawrna nasatak a tawh reng avangin nulear doctrine chu ennawn ngai a ni ta a ni, tiin Kremlin thupuangtu Smitry Peskov chuan a sawi bawk.
Moscow chuan Ukraine in United States ram thuam a dawn long-range missile leh ralthuam pawimawh tak tak a neih te hmangin Russian territory thuktak a kap thei tawh tlat tiin Peskov chuan a sawi bawk a.
Ukraine chuan allies te nen West tena ralthuam an pek te chu Russia ram chhung beih nana hman a dil chamchi tawh a. Tun hnaiah Russia in Ukraine chu a beih nasat zual zel avangin ralthuam tha hman remtihna pe tura nawrna khawthlang ram ten an tawk nasa zual a ni.
A hma zawng chuan khawthlang ram te chuan Ukraine hnena an ralthuam tha pek te chu Russia ram chhung beih nana Ukraine in a hman an remti lo thung a, a chhan ber pawhin indona chuan hlet duhawmlo a chhuah an hlauh vang a ni.
Hetihlai hian Russia chuan Ukraine western city Lviv chu nasa taka beiin hei vang hian mi pasarihin nunna an chan a, an zinga pathum chu naupang an ni.
A hma lawlin Russia chuan central city Poltava chu a lo bei tawh bawk a, hei vang hian mi 50 chuangin nunna an chanphah tawh bawk.
Lviv Mayor Andriy Sadovky chuan Russia chuan drones leh hypersonic missile te a hmang tiin a sawi a. Nunna chan zingah nausen leh hmeichhe naupang kum kua leh kum 14 mi pawh an tel tiin officials te chuan an sawi.
Russia hian Kryvyy Rih khawpui pawh beiin hotel kapfuhin mi pangnga in hliam an tuar niin mayor Oleksandr Vilkul chuan a sawi bawk a. Ukrainian military te chuan ram pumah air alert an tihchhuah thu an sawi bawk.
President Volodymyr Zelensky chuan Russian te chuan beihna an kalpuiah an phutawk hremna an hmulet ang tia sawiin chutihrual chuan Ukraine tana air defence tam zawk a ngen zui bawk a, chu chu long-range missile laka Ukraine him theihna awm chhun a ni tiin a sawi.
Lyiv khawpui hi Ukraine indona kum hnih leh a chanve vela inbeihna nasat lohna ber pakhat a ni a, mahse, tun hnaiah Russia chuan Lviv hi bitum zual ta in a bik takin energy infrastructure lam a thlurbing ta thung a ni.
Hetihlai hian Zelensky chuan Irish premier hmu dawnin Ireland chuan Ukraine indona kalpui mekah tanpuina a pe dawn a. Ireland chuan Ukraine hnenah hian $43 million dollar a pe dwn a ni.
Irish sorkar chuan heng tanpina te hi indona avanga chhiatna thlenga humanitarian assitance, rehabilitation support atan te leh reconstruction atan te a hman tur tiin a sawi.