Russia in Ukraine bei zui zel

Russia chuan Ukraine chu nasa takin a bei chhunzawm zel a. Ukraine chuan air raid alert tichhuak hialin Ukrainian monitor te chuan Russian aircraft in hypersonic missile an kahchhuah pawh a hre fuh a. Drone hmangin nasa taka beih a tawk bawk.
Ukraine air defence forces te chuan Ukraine ram pum chu ballistic weapon a beihna hmachhawn mek tiin an sawi.
Russian defence ministry pawhin thuchhuah a siamah long-range air leh sea-based precision weaponry te chu Ukraine hmun hrang hrang, Kyiv, Lviv leh Kharkiv leh Odesa region a power station beih nan hman a ni a ti.
Pathianni leh Thawhtanni zan khan zan khuaa Russia in Ukraine ram zahve vel lawih drone leh missile hmanga a beihna avangin mi parukin nunna an chan a.
Power infrastructure te tihchhiat a nih avangin khawpui lian ber ber te chuan eng an nei thei lo va, water supply pawh a tibuai hle.
US President Joe Biden chuan Russian chetdan chu na taka sawiselin Washington chuan Ukraine energy grid te chu thlawpin a pui zui zel dawn tiin a sawi a.
UK Foreign Secretary David Lammy pawhin Russia chuan dawizep takin missile leh drone hmangin civilian infrastructure te a bei a ni a ti bawk a.
Russian missile te hian Ukraine eastern city Kryvyi Rih a civilian infrastructure building dengin mi pahnihin nunna chanin mi tam tak an chin hriatlohin an awm phah mek bawk.
Zaporizhzhua regional administration head Ivan Fedorov pawhin Zaporizhzhia beihnaah mi pakhatin nunna chanin hmeichhe pakhatin hliam a tuar a ti bawk a.
Local official Yevhen Sytnychenkoi chuan chenna in, dawr leh vehicle te Russian missile in a tichhe nasa a ti bawk
Kryvyi Rih hi Ukraine President Volodymyr Zelensky home city a ni a, Russian missile hian Kyiv, Sumy, Khemelnytsky leh Kykolayiv region te pawh a deng bawk.