Russia leh Ukraine ramten sipai ruang inthleng leh

Russia leh Ukraine ramten sipai ruang inthleng leh
Russia leh Ukraine chuan thla hmasaa a vawi hnih nana Turkiye-a an inbiaknaa an inrem angin an indonaa thite ruang an inhlan tawn leh tih Kremlin-in a puang.
“Istanbul-a inrem tawh angin Ukrainian sipai ruang 1,000 chu vawiin khan Ukraine kutah hlan leh a ni,” tiin inbiaknaa Russian aiawh hotu, Vladimir Medinsky-a chuan Ningani khan Telegram-ah a tar lang a, Ukraine-in Russian sipai ruang 19 an hlan ve thung tih a sawi bawk.
Sipai an inmansak leh ruang inhlan tawn hi May thlaa Istanbul-a an inbiak hmasak atang khan an kalpui tan a, kum thum chuang an indo tawh hnua hei hi ram pahnih inkara a tha lama indawrna awm chhun a la ni rih.
Medinsky-a’n thlalak a tar lanah chuan medical suit vara inthuamten refrigerated truck hnung atanga body bag an hlangthla lai a lang.
Russia chuan Ukrainian sipai ruang 3,000 hlan a tum a, hei hi kalpui tan a ni tih Russia-a RIA state news agency chuan a tar lang.
June 2-a Istanbul-a an inbiak khan Russia leh Ukraine hian sipai an inmansak 1,000 vel inthleng tawn an lo remti tawh bawk a. An inremnaah chuan sipai hliam tuar na zual leh kum 25 hnuai lam inthleng ni se an ti a ni.
Hetih mek lai hian United States President Donald Trump-a’n Russia chu inkahhai inremna pawm tura nasa taka a nawr chungin Moscow leh Kyiv hian indo tihtawpna lam chu an la hawi rih lo hle.
An inbiaknaah Russia hian thil phut lian tak tak an nei a, heng zingah hian Ukraine-in an ram zau tak an hlan leh khawthlang atanga sipai lama puihna an dawn thin tihtawpte a tel.
Kyiv chuan heng thil phut hi tih ngaihna awm lo tiin a hnawl a, Moscow-in a thil phut a tihniam a nih loh chuan inbiak leh lam pawh a hawi lutuk lo.
Indawrna dangah Qatar ruahmannaa Moscow-a an embassy-a ram hnih an inkawmnaah Russia leh Ukraine-a an chhungte atanga hrang naupangte hawtir leh turin an inrem bawk a. Ningania an inbiaknaah hian Ukraine-a naupang 11 chu hawtir an ni ang a, Russia-a naupang pathum hawtir an ni dawn bawk a. Heng mite nen hian Qatar hmalakna avangin naupang 100 chuang an chhungte nen an inhmu leh dawn tihna a ni.
Ukraine chuan Russia hian indo chhungin naupang 20,000 chuang a la a, Moscow hnenah hian an hming pawh a pe tawh niin a insawi a, heng zinga tam tak hi Russian awp Ukrainian region chhunga kum 2022 atanga a hruaite niin an sawi.
Russian President Vladimir Putin-a chu The Hague-a International Criminal Court chuan ‘dan lo naupang thawn leh an awmhmun sawnsak’ thubuai a siamsak a ni.
Mi tang an inthleng tawn leh hma lawk hian Russian thlawhnaten Ukraine khawchhaka Dobropillia khawpuia bazarpui an kap a, mi pahnih vel thiin mi 22-in hliam an tuar a, thil a tichhe nasa hle bawk niin Nilaini khan Governor Vadym Filashkin-a’n a sawi a. Bazar hi bomb kg 500-a ritin a fuh niin a sawi.