Russia tana ral bei turin sipaiah Kenyan 1,000 vel la – Kenya NIS

Russia tana ral bei turin sipaiah Kenyan 1,000 vel la – Kenya NIS
Kenyan hnuchhuitute chuan Russia tana ral bei turin Kenyan 1,000 vel zet lak an ni tih an sawi a, report an siamah hian mihringa sumdawnna nen pawha inhnawihna thil pawh a awm niin an ring.
Parliament-a Nilainia Kenya-a National Intelligence Service (NIS)-in report an thehlutah hian Russia-Ukraine indona kal mekah February thlaah pawh Kenyan 89-in Moscow tan an la bei niin an tar lang.
Kenyan pakhat thi a awm tawh a, a dang tam zawk erawh hliam leh hlauhna nasa tak neiin an haw leh tawh hlawm niin an sawi bawk.
Kenyan sorkar hian a hma khan Russia tana ral bei an ram mi 200 chuang an awm thu leh Moscow chu hetianga sipaia an ram mi la tawh lo turin an lo ti tawh.
MP-te hnena report pek chungchangah hian parliament-a member ngah ber hruaitu, Kimani Ichung’wah-a chuan Russia–Ukraine indonaa tel ve tura Kenyan-te laa hruai thinnaah sorkar thuneitute inrawlh leh mihringa sumdawng inzar pharhte nen an thawk ho nia sawi chu zahthlak a tih thu a sawi.
Chhuitute hian recruitment agency-te chu Kenyan tumhmuna thawk, immigration officer, Directorate of Criminal Investigations (DCI)-a officer, anti-narcotics officer leh National Employment Authority officer te nen thawk hovin veivahna tur an buaipui thin niin an sawi a ni.
Ichung’wah chuan agency-te hi Nairobi-a Russian embassy leh Moscow-a Kenyan embassy nen pawh Russian visa an neih theih nana thawkhovah a puh bawk.
Narobi-a Russian embassy-in thuchhuah a siamah erawh hei hi a dik loh thu sawiin an hnuaia thawkte chu danlova thil tihnaah inrawlhna an nei lo niin an sawi.
“Ukraine-a buaina awm mekah hian embassy chuan Kenyan khua leh tui, Russia tlawh duh, Ukraine-a Special Military Operation (SMO)-a tel duh ang chi chu visa a pe lo va. Embassy hian hetiang rilru pu tur hian Kenyan khua leh tui tumah a ngen ngai lo bawk,” an ti.
Embassy hian ram dang mi sipai tura an lak ngai loh thu an sawi rualin Russian danah Russia-a awm rang dang mite chu anmahni duhthuin sipaiah an tang thei niin an sawi bawk.
Report-ah hian Russia sipaia tangte hi engtin nge an awm tih tar lan thui a ni lo va, mi 35 erawh Russia-a sipai camp-ah tir an ni a, 39 hliam tuar leh chin hriat loh 28 an awm niin tar lan a ni.
Chhuinaah hian sipai hlui, police officer-a tang thin leh hna nei lo kum 20–50 vel chu a latute hian an duh ber niin an sawi.
Sipaia lakte hi thla khatah Kenyan shilling 3,50,000 thleng pek bakah bonus atan KSh 9,00,000 atanga KSh maktaduai 1.2 thleng pek tiam an ni.
Russia an thlenah rei lo te chauh zirtirna pea indonaa kaltir zui an ni a. Ni kua emaw chauh training hi pek an ni tih tar lan a ni.
Ichung’wah chuan sipai atana hruaite hian Nairobi-a Jomo Kenyatta International Airport (JKIA) atangin tourist visa hmangin Turkey leh United Arab Emirates (UAE) an paltlang niin a sawi a. JKIA-a thlithlaitu dah that a nih hnuah a thawntute hian a kawng thlakin South Africa, Uganda leh an thenawm ram dangah an kaltir hmasa leh bawk thin.
Thuneitute chuan hetianga tite hi an la awm reng a, man thuai an nih erawh a beiseiawm tih an sawi.
Kenyan Foreign Minister Musalia Mudavadi-a chuan thla tharah hian Moscow a tlawh dawn a ni.