Russia Wagner Group ten Hezbollah hnenah Air Defense an pe

US sorkar-a thuneitute chuan Russian Paramilitary outfit-Wagner Group-an tih ten Lebanon hel Hezbollah hnenah van sang atanga invenna (Air defense system) pek an tum thu an sawi.
The Wall Street-in a report danin Russian SA-22, thlawhna missile leh silai hmanga kah thlak theihna inkawp chu hmelma indo thlawhna lo kah thlak nan pek an tum thu a sawi a ni. Hezbollah te hnena ralthuam inhlan chhawnna hi a takin a thleng tih hriat la ni chiah lo mahse Wagner leh Hezbollah te inbiakna chungchang hi ngun taka vil reng a ni a, US thuneitu te chuan ralthuam chungchanga thawhhona hi an ngaih thutak hle thu an sawi a ni. US-a Russia ram Embassy chuan hemi chungchangah hian engmah sawi an la nei lo a, amaherawhchu, White House National Security Council thupuangtu Adrienne Watson chuan Ningani tlai khan ralthuam inhlan chhawnna chungchang hi a lo sawi ve bawk a ni. Hezbollah ten Assad pui tura an awmna Syria rama Wagner Group te lo awm ve hian thil a tih buarchuar belh a ni.
US intelligence te sawi danin SA-22 system hi Syria hnenah lo pek tawh a ni a, hei hi Assad-a phalna in Hezbollah te kutah awlsam tea hlan chhawn theih a nih thu an sawi a ni. He ralthuam inhlan chhawn theih thil thuah hian helai bawr vela Russia inrawlhna lian zawk a awm theih thu leh Iran nena in inlaichinna thang duang tak a tih chak theih thu an sawi bawk. Iran hi Russia hnena drone supply-tu pawimawh tak niin drones siamna kawnga ram pahnihte thawh dunna hian an inlaichinna than chak zelna kawngah pawh kawngro a su hle a ni. Iran remtihnaa Hezbollah hnena SA-22 hlan chhawn a nih chuan Iran tan thiltih mawi lo tak a nih theih thu analysts thenkhat chuan an sawi a ni. SA-22 system, Pantsir ti a an sawi bawk hi mobile hmanga air-defense niin aircraft, drones te lo kah thlak theihna a ni.