Rangvamual leh Phunchawng zu a hlauhawm a, a thianghlim lo a, hriselna a tichhia niin Mizoram Excise & Narcotics (MEN) department hotute’n an sawi.
-- Advertisement --
An sawi danin, zu siam dan pangngaiin an siam lo a, tun hnai engemaw lai atang khan khawchhak lam atangin zu siam dan thar an hria a, chutianga an siam chu a neitu tan a hlawk a, a zu-a kha a hrisel lo ta thung a ni.
Zu an sak chuan an bilh a, an up a, ni nga ni ruk te an nghah hnuah an thlawr thin. Tuna Rangvamual leh Phunchawng vela an siam dan chu, MEN department hotute sawi danin, lei an lai khuar a, a chhuat leh bang chu silpaulin-in an tuam a, chu tunlaia zu factory kalphung a ni. Zan thum zan li nghak lovin ni khat lekah an zo mai.
‘Instant yeast’ leh chini an pawlh a, zu rim a nam theih nan ‘khamir’ (zu fe) tlem azawng an telh bawk.
Chutianga siam chhuah zu chuan a intute a khawih ta a, doctor-te hnen atanga MEN department lamin an hriat danin, lung, chuap, kal, thin, mihring taksa bung pawimawh a khawih a, lungphu chawl, mitliam, nerve tha lo, pum tha lo te a thlen thei.
MEN department hotute chuan Phungchawng leh Rangvamual velah hian zu siamna (factory) 300-400 vel a awm a, tuna an siam dan thar hi a hlawk bakah hun a duh rei lo a, a siamnaa inhlawhte hian ni khatah Rs 2000 te an hlawh thei.
Rangvamual leh Phunchawng vela zu siamna leh a zawrhna hi an thang nasa a, Aizawl leh a chhehvel chauh ni lovin Mizoram hmun hrang hrangah an zu siam hi a thleng tawh tih chu MEN department hotute sawi dan a ni.