Sa leh artui mamawh pung Tualchhunga thar tlahniam

Sa leh artui mamawh pung
Tualchhunga thar tlahniam
Mizoramah sa, artui leh bawnghnute mamawh (ei ral) zat a pung zel a, tualchhunga thar chhuah a pung lo mai niloin a hniam zawngin a kal.
AH & Vety department chuan heng mamawh a nih dan hi chhut dan leh rin bik a nei a. Bawnghnute leh artuiah hian Indian Council of Medical Research (ICMR) recommendation angin a chhut. Sa pawh hi species hrang hrang angin mamawh/ ei ral zat hi chhut theih a nih loh avangin ‘ICMR recommendation of meat’ ang thoin a chhut.
Hemi ang hi chuan, sawrkar kum anga chhutin 2023- 2024 atanga 2025- 2026 inkarah, 2023- 2024 ah bawnghnute litre nuai 1263.63 Mizoram-in a mamawh a, artui pum nuai 2589.42, sa tonne 17853 kan mamawh a ni. 2024- 2025 ah bawnghnute litre nuai 1287.04, artui pum nuai 2644.61, sa tonne 18233 mamawh niin, 2025- 2026 ah bawnghnute litre nuai 1314.47, artui pum nuai 2700.98 leh sa tonne 21657 mamawh a ni.
2025- 2026 bikah hian sa hi ICMR chhut ang chuan tonne 18622 mamawh anga chhut ni mah se, AH & Vety department-in household survey a neihah mamawh zat tak hi tonne 21657 ni ah a ngai a ni.
Hetihlai hian Mizoram-in heng ho a tharchhuah dan hi department chuan sawrkar laipui Ministry of Fisheries, AH & Dairying-in chhut dan – methodology a duan a hmang ve thung a. He methodology ang hi chuan, sa tharchhuah bikah hian kan ei ral zat atanga lakhawmin, data lakkkhawm atanga estimate hi tharchhuah (production) anga hman a ni.
He chhut dan angah hi chuan, 2023- 2024 khan Mizoram-in bawnghnute tonne (ton khat chu litre 1000) 25431, artui pum nuai 400, sa – bawngsa tonne 4630, vawksa tonne 5171, arsa tonne 6443, kelsa tonne 229 tharchhuah a ni a. 2024- 2025 ah bawnghnute tonne 23510, artui pum nuai 422, bawngsa tonne 4260, vawksa tonne 4460, arsa tonne 5900, kelsa tonne 220 a ni a. 2025- 2026 erawh kum kal mek a nih avangin estimate siam theih a la ni lo.