SAFF U-19 Women’s Championship khel tur Mizo tleirawl Cindy Remruatpuii Colney

Mizoram footballer Cindy Rem-ruatpuii Colney chu tunthla February ni 2-8 chhunga Bangladesh khawpui Dhaka-a ram palite inelna tur South Asian Football Federation (SAFF) Under-19 Women’s Championship 2024 hmachhawn tur India squad-ah a tel.
India national U-17 women’s team-ah hian hmarchhak atangin player pariat thlanchhuah an ni a, an zingah Armed Veng tleirawl Cindy hi telin, midfielder a ni.
Cindy pa Lalbiaksanga Colney (BS-a) hi Mizoram Police leh Armed Veng player tha thin niin, hliam avangin BS-a hian kum naupangtein football khelh a chawlhsan a, chumi hnuah police coach niin, a fanu pawh hi a ei tling chho tura a hrual seilen a ni.
Armed Veng tleirawl Cindy hian state leh national-level championship hrang hrang khel tawhin, chu’ng zingah chuan junior level inelna ngaihhlut hlawh Subroto Cup bakah 2021 Khelo India Youth Games a tel nghe nghe.
Head coach Sukla Dutta chuan tunkar Thawhtanni khan SAFF U19 Women’s Championship 2024 khel tur member 23 awmna India squad puangin, Thawhlehni khan Young Tigresses hian Bangladesh an thlawklut zui nghal.
Naktuk, Zirtawpni chawhnu dar 2:30 hian Indian U19 girls chuan an match hmasaberah Bhutan an tum dawn a; February ni 4, Pathianniah defending champion leh a thlengtu ni bawk Bangladesh hmachhawnin, February ni 6, karleh Thawhlehni khan Nepal an su zui leh ang.
2021 runners-up India U19 women’s team hian kum thum liamta final-ah khan sikhat faia Bangladesh hneh loin pahnihna dinhmun an luah a; tunah tawnhriat zau zawk nen an champion zawh lohna ramah bawk inrintawkna thuk zawk nen an kirleh a, AIFF pawhin India tleirawlte lakah hian beiseina sang tak a nei.
Round robin format hmanga khelh tur league round khelh zawha point hmu sang pahnihin February ni 8 tlai dar 5:30-ah final an khel dawn a; final telin tournament chhunga match sarih an khelh tur zawng zawng hi Dhaka khawpuia Bir Sherestha Shaheed Shipahi Mostafa Kamal Stadium-in a dawl dawn a, inkhelte hi Sportzworkz YouTube Channel lamah live-a pek-chhuah thin a ni ang.
2022 champion Young Tigresses enkawltu head coach Sukla Dutta hi India international hlui niin, kum 1980 bawr chho khan India hmeichhe team player pawimawh a lo ni tawh a; Thawhlehnia Hazrat Shahjalal International Airport a thlen rualin chanchinbumite lamin tournament-a a team thlenpui theih beisei chin an zawhna chhangin, a naute a rin tawk thu a sawi.
International goal riat khung tling Dutta chuan, “He hmun kan lo thlen hma hian Goa lamah camp kan lut a, rei lo mah se ni 15 chhung training kan kalpui a, ka naute hian tha takin SAFF Championship hi an hmachhawn ang tih ka chiang a ni. He team hi an chhe lo a, thiamna sang tak nei an ni,” a ti.
India coach chuan sawizawmin, “He team-a player tam zawk hi U17 batch tir lam chauh an la ni a; chubaka beiseina min siamtu dang chu Goa kan pankhawm hma khan an zinga a tam zawk hi IWL khelin an buai char char a; an practicehnem a, match an khel tam bawk a, chu chuan tuntum tournament-ah hian a pui hle dawn a ni.
“Technical leh tactical lama kan inbuatsaih dan chipchiar chu sawi-chhuah ka tum lo a, ka ngaihpawimawh ber chu team chhunga inlungrualna leh khelmuala thawhhona tha a ni,” tiin a team kaihhruai dan a sawi.
Cindy leh a thiante hian Dhaka an thlen hnuah an thlenna hotel panin, an hahchawl det a, Nilaini atang khan training zangkhai an kalpui tan a, naktuk hian tournament bul an tan tawh dawn a ni.
Defending champion Bangladesh hian tournament hnuhnungber final-ah khan sithum faia Nepal hnehin SAFF Cham-pionship-a an chungnunna an sawhnghet a; kum 2018, 2021 leh 2023 champion hi he tournament vawili khelh tawha team hlawhtling ber niin, kum 2022 khan India a lo champion ve tawh bawk.
Nikum khan India hian Bhutan laka 12-0 tehreng hnehna nen beiseiawm takin bul tan mah se team pali zinga pathumna niin champion lai chuan final an lut zo lo a, lunghnur takin Bangladesh an chhuahsan.

India 23-member squad

Goalkeepers: Khushi Kumari, Anika Devi Sharubam, Hempriya Seram

Defenders: Heena Khatun, Vikshit Bara, Sonibia Devi Irom, Juhi Singh, Nishima Kumari

Midfielders: Shivani Toppo, Lalita Boypai, Akhila Rajan, Rivka Ramji, Arina Devi Nameirakpam, Cindy Remruatpuii Colney, Menaka Devi Lourembam, Sibani Devi Nongmeikapam, Thoibisana Chanu Toijam

Forwards: Babita Kumari, Nitu Linda, Sulanjana Raul, Neha, Pooja, Sahena TH

Head Coach: Sukla Dutta

India fixture

Feb 2 : India vs Bhutan 2.30pm
Feb 4 : Bangladesh vs India 6.30pm
Feb 6 : India vs Nepal 2.30pm
Feb 8 : Final (Top 2 teams) 5.30pm