Saints in Ramsdale an la

EPL a kir leh Southampton chuan si nghak thar an nei a, Arsenal leh England si nghak Aaron Ramsdale chu nipui bazar tawp ni khan an la lut fel.
Saints hian kum 26 mi Ramsdale hi kum li daih contract an ziahpui. Arsenal hnenah Ramdale manah £18m an pe phawt a, £7m pek belh leh thei dinhmunah an ding. Hetiang zat an pe leh a nih chuan Ramsdale mana an sen zawng zawng hi £25m a ni ang. Arsenal chuan Ramsdale hi kum 2021 khan Sheffield United atangin an la lut a, a manah £26m an seng. Berd Leno chhuah hnuin Ramsdale hi Gunners si nghak duh thlan a ni hman a, David Raya an lak luh hnuin a dinhmun a hloh ta tlat thung. Arsenal player a nih chhungin inelna hrang hrangah vawi 89 a khel a, England tan vawi nga khel tawhin, Euro 2024 England squad-ah a tel nghe nghe.