Sangha Chhiarkawp

Nimin khan Mamit district-ah PMMSY hnuaia ‘sangha khawina tur tuikhuah (Constrcution of New Rearing Pond) tanpuina’ diltu mi 40 hnenah tanpuina sem chhuah a ni a.
Sangha dil tanpuina sum sem thu hi tunhma atang tawha chanchinthar luah tamtu pakhat a ni thin; hei, tunah pawh hriat tur a la awm reng hi.
Mizorama sangha dil a tam tawh dan atanga chhut chuan, state dang atanga sangha hi chawk luh ngai lova keimahni state mipui ei khawp hi chu thar chhuak ve thei tawha mawi kan ni awm e.
Mizoram fisheries department record dan chuan, tunah (2024-2025) hian Mizoramah sangha dila eizawng chhungkaw 22,661 awmin, sangha dil zau zawng belhkhawm hi Hectare 6367.58 (A dung Km 63.67; a vang Km 63.67) a ni.
Kum 2024-2025 chhunga Mizoram sangha dil atanga sangha tharchhuah hi Metric Tonne (MT) 6852.16 a ni a. Chawhrualin Hectare khatah sangha MT 1.35 thar chhuak ang kan ni. Chumi awmzia chu, sangha dil len zawng metre 100 bialah sangha Kg 1350 a thar chhuak a; Sangha pakhat hi Kg 2 vela rit anga chawhrualin, Sangha pum 675 tihna a ni. Lammual ground tiat sangha dilah sangha pum 675 a tharchhuak dawn tihna ang a ni mai awm e; sangha an thawl hle dawn tihna a ni.
Fisheries deptt-in a chhut dan chuan, Mizoram mipui nuai 12.51 velin sangha an ei a, mi pakhatin kum khatah sangha kg 11 ei tur anga chhutin, tuna Mizoram tharchhuah hi chuan mi pakhat tan kg 5.72 a thar chhuak tawk tihna a ni. Chumi awmzia chu, per capita consumption ang chuan, mipui mamawh chanve vel Mizoramin a tharchhuak a, a chanve chu state dang atangin kan chawlut tihna a ni.
Sangha tharchhuah kawngah hian a kum telin hma kan sawn chho ve zel tho a, mahse hmasawnna tur erawh kan la ngah hle. Mizorama sangha dil tam falna chu Kolasib leh Mamit district te hi an ni a, mahse state dang atangin heng laia sangha tharchhuah hi an rawn la ve nual nia sawi a nih avangin a chunga Sangha Chhiarkawp khi chu a tak takah chuan a dik thei dawn lo a ni.
State dang atanga sangha kan chawk luh hi kan mamawh atanga 70% daih a nih a rinawm. Chuti a nih chuan, sangha dil zau tak nei chung siin, sangha man cheng vaibelchhe tel tehmeuh chu state dangah kan vawrh chhuak hum hum reng mai tihna a ni.