Sangha ei fo a tulna chhan

Sangha hi khawvela chaw hrisel ber te zinga mi a ni a, nutrition chi hrang hrang heng vitamin D leh protein te a pai tam em em a ni. Hei bakah hian omega-3 fatty acid a pai hnem bawk a, chu chu kan thluak tan chaw tha tak a ni. Sangha-ah pawh heng salmon, trout, sardine, tuna leh mackerel te hi ei ngun lehzual tur a ni. Mithiam ten zirchianna hrang hrang an neih atanga an hmuh danin sangha regular taka ei hian natna chi hrang hrang lakah min veng thei niin an sawi. Tun tumah hian Times of India health section-in sangha ei fo a tulna chhan ni a an sawi te kan rawn tarlang e.
1. Muttui nan a tha. Zan mut theih loh chhan chi hrang hrang a awm thei a, tunlaiah phei chuan smartphone kan khawih nasat avangin blue light exposure a nasa a, hei bakah hian vitamin D taksa mamawh ang kan hmuh loh vang tein zan mut that loh phah kan tam hle. Mithiam ten zirchianna an neih tharah chuan thla ruk chhung participant te salmon kar khata vawi thum ei ziah te chu zanah an mu tha bik niin an sawi. Mithiam te chuan he sanghaah hian vitamin D a tam a, chumi vang chu a nih an ring.
2. Thluak hnathawh a tichak. Kum a lo upat telh telh hian kan thluak hnathawh pawh a chak lo ve tial tial thin. Tlem tlema thluak hnathawh lo chak lo ve deuh chu thil pangngai a ni a, mahse, heng Alzheimer’s lakah te hian kan inven a ngai. Mithiam ten zirchianna an neih atanga an hmuh danin sangha ei that hian thluak a tichak a, Alzheimer’s risk pawh a tihniam thei niin an sawi a, kartin sangha vawi khat tal ei thin te-ah chuan gray matter a tam zawk niin an sawi a, gray matter chu thluaka functional tissue a ni. Gray matter a tam chuan thil chhinchhiah theihna leh hriatrei theihna a chak dawn tihna a ni.
3. Taksa peng hrang hrang thanna atana pawimawh omega-3 fatty acids a pai hnem. Omega-3 fat docosahexaenoic acid (DHA) hian thluak leh mit a tichak thei a, chuvangin nu, naupai lai tan omega-3 fatty acids tamna chaw ei tam a tha a, chutihrualin naupai lai chuan sangha ei tur thlan thiam a pawimawh a, mercury tlemna sangha chauh ei tur a ni.
4. Depression tan a tha. Tunlaiah rilru kan seng nasa a, rilru leh taksa hah avangin depression nei te pawh kan tam ta. Kan thahrui a lo zuai a, kan hlim lo a, engmah han tuipui em em kan nei lo a, tih chak em em te pawh kan nei lo a, nun te pawh ho riaua hriatna kan nei. hetiang hi kan awmdan a nih chuan rilru hriselna lamah harsatna kan nei tihna a ni. Mithiam te chuan sangha regular taka ei hian depression a veng thei niin an sawi a, a chhan chu sanghaa omega-3 fatty acids awm tam vang a ni.
5. Heart attack leh stroke risk a tihniam. Lung lam natna chi hrang hrang heart attack leh stroke te hi a tam ta hle. Exercise lak that leh lung tana chaw tha ei te hi a pawimawh. Lung tana chawtha zinga pakhat chu sangha hi a ni. Sangha hian omega-3 fatty acids a pai hnem a, chu chuan lung natna risk a tihniam thei.