By Rempuia R. Lutmang
-- Advertisement --
Politics nunau chiauhiar tak tak karah thu ho te te hi kan dan pangngai bawkin lo sawi ve leh bauh bauh teh ang. Heta ‘chiauhiar’ ka han tiha hi mi thenkhatin ‘chiarhiar’ an lo ti em maw ni, an tet lai atanga an hriat sual, an than lenpui a ni ta ve ang.
Tun hma thu leh hla kan chhiar chuan kan hria ang a, Sap tawng a lo inzeh zeuh tawh phawt chuan hawrawppui hman tur an ti em maw tih mai turin, ziak mi a tua te pawh khan a eng thumal pawh hi hawrawppuia ziah tan chawt an ching hle. Grammar te an la thiam lo kan ti a ni mai thei, a dik; mahse, grammar bu siamtute meuh pawhin an duhna lai laiah hawrawppui an hmang chawt fo tho. Sap tawngah chauh pawh a ni hran lo, hnam dang tawng kan seng luh, kan tawng ang maia kan hman zui takah pawh an hmang tho.
Hmakhawsanga kan pi leh pute khan khawl lam thil an nei lo a, hliam ilo zawnna atan ‘hlang’ te, ‘tawlai’ te an siam a, an hmang tangkai hle. Chu ‘tawlai’ atanga lo piang chho ta zel chu a ni ang, ke nei, lir thei, chuan theih an siam a, ‘tawlailir’ an ti a, chu chu a chuana chuan theihah chuan an ‘lirthei’ neih chhun a ni mai awm e. Mi thenkhatin ‘tawlai’ tih tawi tuk mai an ching a, tawlai chu lir chi a ni lo a, mi zawnna hmanrua a nih avangin ‘tawlailir’ tih hram a tha. Inrinni ni na na na ‘Rinni’ tih ching pawh an awm, lam kim hahthlak an ti viau ni maw.
Sap leh Vai an lo lian a, ‘lirthei’ tak tak kan lo hmelhriat chho ta a. ‘Lir thei’ nazawng chu ‘lirthei’ ti loin, khawl hmang chin chu ‘lirthei’ kan ti a, ‘lirthei’ tih chu tun thlengin hmang reng tho mah ila, a Sap tawng ‘motor’ tih hi hun bul atanga hman thin sa a ni ve reng a. Chumi kan ziah dan chu a ni kan sawi dawn ni.
Hming naran, thil sawina naran hi grammar thiam chuan ‘common noun’ an ti a, hawrawppui hmanna tur ve renga a awm fuh ve khiah te a nih ngawt loh chuan hawrawpte veka ziah tur an ti. Hming bik a awm leh a, chu chu grammar thiamte bawkin ‘proper noun’ an ti a, hei erawh hi chu a hawrawp hmasa ber hi hawrawppui hman ngei ngei tur a ni thung.
Lirthei sawina chi hrang hrang, a pianzia azir te, a hmanna azir tea sawina reng reng hi common noun vek a ni. Heng – car, bus, taxi/cab, saloon/sedan, moped, scooter, motorbike, motorcycle, van, minivan, limousine, auto rickshaw, pickup, tractor, truck, lorry, excavator, bulldozer, road roller, adt. hi hawrawpte hmanna tur chi vek a ni.
Motor tih hi common noun a ni a, a pianzia azira sawina, car, bus, adt. pawh hi common noun vek a la ni. A siamtu company hming, Maruti, Suzuki, adt. leh an lirthei siam chhuah hming atana an vuah bik, Sumo, Alto, Swift, adt. hi proper noun a ni chauh a, proper noun a nih chauh loh chuan hawrawppui hman loh tur. Motor pianzia sawina tho, SUV, MUV, XUV te hi proper noun ni lo mah se lam tâwi (initialism) a nih avangin hawrawppui hlanga ziah a ni thung; a lam pum kan hman chuan hawrawptê vek tur a ni tho. Zawhna tlanglawn sawina chu FAQ tiin hawrawppui vek an hmang a, a lam pum “frequently asked questions” tih chu hawrawptê veka ziah a ni leh tho ang hi a ni a; number pawimawh, eng emaw atana hman tur bik chu PIN tiin kan ziak a, a lam pum chu hawrawptêin “personal identification number” a ni leh si ang hi a ni ber.
Kan hman dan lo en tawh ila. Khawlkungi chuan a thawnthu ziah ‘Chantawka Khawrel’ tihah, “Kan chuanna tur Motor pawh a lo thleng tawh,” tih a hmang a, hei hi ziah dan dik lo chu a ni. Sap tawng a nih avangin a ropui sawt bik chuang lo a, hawrawppui hman ngawtna tur a ni lo. A thlavang hauhin, a ziak uluk lo palh a ni ang, kan ti thei. Ni thei teh meuh mai; mahse, vawi khat chauh a hmang lo; chu bakah Sap tawng dang tam tak, taxi, truck, office, hostel, gate, deputation, quarter (quarters), concert, hall, cyclone, register, adt. hi sentence laklawha lo tlazep pawh ni se hawrawppuiin a ziak tan zel. Chu vang chuan, Sap tawng a nih avangin hawrawppuiin a ziak tan chawt zel a ni tih a chiang hle.
Sapin ‘train’ an ti a, Vaiin an lo hre ve a, a thenin ‘trena’ an tih laiin thenkhat dangin ‘relaghari’ an ti a, chu chu hre thelh ve lehchhawngin Mizote chuan ‘rel’ kan lo ti ta a. Grammar atanga en chuan ‘rel’ chu common noun a ni a, a hmaa kan sawi tak ‘motor’ tih ang chauh tho kha a ni. Hnam dang tawng atanga kan hriat vang nge ni dawn, Mizo tawng grammar bu siam hmasatu K. Zawla chuan proper noun anga chhuahin ‘Rel’ tiin a ziak hmiah tho. A lehkhabu ‘Mizo Pi Pute leh An Thlahte Chanchin’ tihah, “NEFA ram lama Mizo tlangval kalte chuan Rel an la hmu ngai si lo va, mak an ti em em a, Halflong tlanga Rel kiu ruai ruai chunga an han kal chu…” a ti a, chu chu ziah dan dik lo a ni.
Kan chhuanvawr JFa pawh a fihlim bik lo, Ethel-i hnena a lehkhathawnah, “Nimin piah khan Secretariat kawtah Car nalh tak mai hi a tleng zal zal mai a,” tih a hmang a, ‘rel’ te, ‘car’ te, ‘bus’ te hi ‘tawlailir’ tih ang chauh tho bawk, Sap tawng a nih tak avanga hawrawppuia ziah tan an phu bikna a awm chuang reng reng lo. A ti palh em ni ang? Ni lo e, office, culture, programme, radio, adt. pawh, Sap tawng thumal tam tak chu hawrawppuia ziah tan chawt a ching ve hle tho. ‘Bible Thlirna’-ah pawh, “Hmeichhe thu dawn takin, Bus kha lo nghak ta lo ila chu tunah te hian in ka thleng tawh tur,” tih a hmang a, ‘Bus’ tih hi ziah dan dik lo tho kha a ni.
Zikpuiia Pa hian lirthei lam chu a ziak dik thei viau, hawrawptein ‘motor car’ a ti puam deuh talh zel a, thil dangah erawh chuan a thiante ang thoin, ‘hotel, breakfast, tourist, college, cinema, doctor, sipai, police, research’ tih angreng te hi a duh hun hunah hawrawppuiin a ziak tan ve tho. L. Keivom khan lirthei chungchangah chuan hawrawppui tur leh hawrawpte tur chu hre riauin a lang, “Tun lai angin Maruti car emaw, Ambassador car emaw, Bajaj scooter emaw a la awm ve lo va,” a ti a, proper noun leh common noun chu a thliar fel thiam angreng.
Mi dang ang bawkin Thanpuii Pa (J. Malsawma) pawh hian Sap tawng chu hawrawppuia ziah tan mai a ching ve hle bawk. ‘Motor’ tih taka hi chu a hmang thiam viau a, “Kan chuanna tur motor chu…” a han ti a, a dik a ni. A chhunzawm zel a, “… bungraw phurhna ang chi Truck an tih hi a lo ni reng mai a,” a ti ve leh ta tho a (Vanglai). Hetiangah hian Lalhmingliana Saiawi hi a thiam ber a ni mai awm mang e, a lehkhabu tlar tin kan keu hman lo na a, Sap tawng a nih avangin hawrawppui a hmang ve ngawt ngai meuh lo.
Kan han sawi lan kan mi thiamte kha tunlaiah chuan hranghlui an ni ta a, a zawng a zaa Sap tawng apianga hawrawppui hmang zat zat an ni lo tih kha hre tel bawk ila. Amaherawhchu, kal hmasate khan Sap tawnga hawrawppui hman chawt an lo uar hle tih zawng kan hre thei a, chu chu kan la entawn zel a ni ang, tun thleng hian chutianga tih ching chu kan la awm.
Hranghlui chu hranghlui ngang an ni a, an hun laiin ziah dan a la mumal em em lo bawk nen, kan dem thei lo ang. Tunlaiah chuan ziah dan mumal tak kan nei titih tawh a, Sap tawng lo tlazep naran mai mai hi chu ziah dan thiam tawh awm tak kan ni, lehkhabu chhuah thei chin tal chuan hriat a ngai. Tun hmaa mi kha chu kan dem phal lo, an hun lai a rei tawh, dem chi pawh an ni lo, ‘An lo ti thin ngei e’ tih tichiangtu atana thur chhuak chauh kan ni; amaherawhchu, tunlaia mite hi chuan an tih dik loh kha hre ve tawh tur kan ni, hma sawn zel tur kan ni si a.
Tun hnai lawka chhuak ‘Lalnunmawia Diary’-ah, “…dar 7 am-ah Truck-ah kan hlang fel,” (May 20, 1970) tih te; “…Betbeti lam panin Bus-in ka chhuak a,… thingpui te kan in zawhin Bus vekin kan hawng leh a,” tih te (August 21, 1970) tih te; “…chaw ei kham hnuah Taxi-in Betbeti lam panin kan tlan a,” (May 19, 1970) tih te; Sap tawng a nih avanga hawrawppui hman chawtna a la tam hle. Editor an awm lo a ni ang tih dawnin mi pahnih lai hming a chuang lawi si. Editor-te khan a hawrawppui hmanna an zah ang a, an khawih danglam ngam lo pawh a ni mai thei e. ‘Nge a hawrawp eng mah kha an tidanglam lo hrim hrim zawk ni ang, a nih chuan a eng lai nge an edit ang aw, tih kha inzawh theih a ni ve.
Ziah dan dik hi a pawimawh a, thuziak tihlutu a ni. A pawimawh em avangin ram changkangah chuan ‘style guide’ siamtu an awm. Mizo Language Committee pawhin “Mizo |awng Ziah Dan” tih chu vawi 4 lai an tichhuak tawh. Ziah dan kan sawi tak, mi thiamte inhnial buaina pawh ni lo, thil ho te te kha chu lehkhabu siamtute leh thu leh hla ziak thintute hi chuan a dika hman tum hram hram ila a tha.