SASCI loan puk tam duh vangin sawrkarin scholarship a tibuai zo – MNF Thalai
SASCI loan puk tam duh vangin
sawrkarin scholarship a tibuai zo
– MNF Thalai
Mizoram sawrkarin SASCI loan puk tam a duh luatah zirlaite dawn tur scholarship chu SNA SPARSH model-ah a lo ziaklut a, hei hian pekchhuah hun a tikhawtlai zo ta tih MNF Thalai chuan an sawi.
MNF Thalai vice president Lalnunmawia Pautu chuan, scholarship hi kum 2023- 2024 ah zirlaiten an dawng kim loa, kum 2024- 2025 ah phei chuan an dawng miah lo. A chhan hriat tumin an chhui a, sawrkar laipui Ministry of Tribal Affairs leh Finance ministry hnuaia Department of Economic Affairs-ah chhuilutin, Mizoram sawrkar hian scholarship scheme chu a department changtute pawh rawn loin SNA SPARSH model (single nodal account) a a lo on-board (ziahluh) vang a ni tih an hmu chhuak tih a sawi a ni.
“Hmanhmawh tak leh a scheme enkawltu Mizoram Scholarship Board pawh rawn loa a ruk a rala he scheme SNA SPARSH model-a an on board chhan hi SASCI loan puk tam duh vang a ni tih pawh phat rual lohin a chiang niin kan hria,” a ti.
Kumin July 7 khan Ministry of Tribal Affairs chuan Mizoram sawrkar hnenah scholarship atan Rs 50,42,81,000 a rawn pek tawh laiin, vawiin thlengin zirlaite hnen a la thleng lo tih MNF Thalai hruaitu hian a sawi a. “ZPM sawrkar hian a tih dik lohah mawh la in, zirlaite hnenah ngaihdam dil se, scholarship pek chhuah thuai a nih theihnan tihfel ngai tifel zung zung turin kan phut a ni,” a ti.
Central sponsored scheme ho chu Mizoram sawrkar hian SNA SPARSH model-ah a on-board mek zel tih an hriat thu pawh sawiin, CSS tam tak on-board loh a la awm lai a, a portal-ah pawh Mizoram-in duh duha thuneihna a neih lohna scheme, zirlai tam tak tawrhna thlen thei ni si, sum puk tamna atana a lo dahhkham chu pawi a tih thu a sawi bawk.
Kum 2023-a ZPM-in sawrkarna a chan atanga tun thlengin, zirlaiten scholarship an dawng mumal thei lo tih Lalnunmawia Pautu hian a sawi a. Record-a a lan danin, 2023- 2024 session-ah zirlai 3981-in scholarship an la dawng kim loa, 2024- 2025 session post matric zirlai 28459 leh pre-matric 8788-in scholarship an la dawng miah lo niin a sawi.