Saudi pan fuh lo Bergwin

Europe a nipui bazar inhawn lai khan Ajax leh Netherlands forward Steven Bergwijn chuan Saudi Pro League club Al-Ittihad a pan. Netherlands head coach Ronald Keomann chuan Bergwijn hi ram tan a khelh leh ngai tawh loh tur thu a hrilh nghal hmak a, Saudi Arabia a pan fuh hmel loh khawp mai.
Steven Bergwijn hi academy lar Ajax academy atanga inzirchhuak a ni a, player tha tak a ni. Dutch club lian PSV ah mit la takin a inlan a, a khelh that theih em vangin Premier League club lian Tottenham Hotspurs in an la lut. Tottenham tan hian inelna hrang hrangah vawi ruk khelin, goal 7 a thun hman. Hemi hnu hian a chawrchhuahna Ajax-ah a let. Ajax tan hian inelna hrang hrangah vawi 57 khelin, goal 24 lai a thun. Club tan a khelh that thin vangin Netherlands aiawhin a khel fo va, Holand tan hian vawi 35 khelin goal 8 a thun tling tawh. Kum 26 mi chauh a la ni a, Ajax leh Netherlands player pawimawh a ni mek. Hmabak eng tak a neih laia league hniam zawk Saudi Pro-League a pan mai hian mak tih a hlawh a, sum vang ni ngeia ngaih a ni. Bergwin hian kar khatah €88,462 a hlawh phak dawn niin tarlan a ni.
Bergwin hian kum 26 mi chauh ni a, a vul lai taka Saudi Arabia a pan mai hian Netherlands head coach Ronald Koeman thin a tina na hle. Koeman hian Al-Ittihad player thar Bergwin hi ram tan a khelh leh tawh ngai loh tur thu a hrilh nghal hmak. Manager tawnhriat ngah Koeman chuan, “Kum 26 mi lek player tan chuan sum leh pai lungkham lovin infiamnaah hlawhtlin tum zawk tur a ni. Hei hi ka ngaihdan nghet tak a ni a, Bergwin hian ka ngaih dan hi a hrechiang hle. Infiamna a hlawhtlin aia sum ngaihventu tan Netherlands tan khelhna hmun a awm lo. Atan international career chu tihtawp fel a ni”, tiin press conference-ah a sawi.
Player langsar tak takin sum tamna Saudi Arabia an pan a, an hlawh sang thei hle. Saudi pantu tam zawk hi player upa lam an ni tlangpui. Chawlh dawn hnaiah hlawh tam tak hlawh hi thil hriatthiam awm tak a ni. Chutihlaiin football ngaina ngai lo ram, Cristiano Ronaldo, Neymar leh Karim Benzema te meuh pawhin an pan chunga entu tlem tial tial tho Saudi Pro League ngei mai kum ngaupang zawk ten an pan hian mak tih a hlawh thung. Kum naupang zawk ten Saudi Pro League an pan chhan chu Ronald Koeman sawi ang hian ‘Sum to sum’ a ni ber mai!