Sawhthing chhiarkawp

Mizoram Economic Survey 2024-25-in a tarlan danin, October ni 18, 2024 thlenga Mizorama sawhthing chin zat chu quintal 1,69,395.72 a ni a. Tun (May 20, 2025) thlenga sawrkarin sawhthing a lei tawh zat chu quintal 1,14,622.82 a ni bawk.
Sawhthing tharchhuah beisei zat hi quintal nuai 10 chuang (10,84,975 qntls) a nih thu Sept 19, 2024 khan Chief Minister chuan Vanapa hall-a “Bana Kaih (Handholding) Scheme” a tlangzarh tum khan a sawi a. Khatih laia sawhthing chingtu zat record chu chhungkua 25,154 a ni a; tuna Economic Survey 2024-25 in a record zat chu chhungkua 25,327 tih a ni leh a, chhungkaw 173-in an pung leh hret tihna a ni a, tharchhuah zat beisei pawh quintal nuai 11 dawn tihna a ni ta a ni.
Tuna Sawhthing lei zat hi, a chi chin zat atanga 67.6% a ni a, sawhthing tharchhuah beisei zat atang chuan 10.5% vel a ni ve thung.
Sawrkarin sawhthing a lei zat hi record fel tak a awm avangin kan hria a ni mai a, sumdawng ten sawhthing an lei tawh zat erawh record hmuh mai tur a awm loh avangin kumin chhunga Mizoram tharchhuah sawhthing dehral tawh hrim hrim hi hriat mai theih a ni lova. Sawrkarin a lei zat ang hu hi sumdawng ten lo lei ta pawh ni se, Mizorama sawhthing tharchhuah tur beisei zat quintal nuai 10 chuang atanga 20% vel chauh dehral a la ni dawn tihna a ni.
Sawrkarin sawhthing a lei dan tur chungchangah hian, rate tha zawk Rs 50 chunglama sawhthing hralh theite chu sawrkarin a buaipui dawn lova, Rs 50 tling lova an hralh erawh chuan a tlin lohna zat kha sawrkarin a hnawhkhahsak dawn, tih a ni.
Tun dinhmunah chuan sumdawngten sawhthing an lei ngamna rate hi a tlahniam hle a, a tlangpuiin cheng 25-30 vel a ni awm e. A tha lama chhutin Rs 30 pawh lo ni se, sawrkarin a hnawhkhahsak tur hi cheng 20 tihna a ni a. A lo berah quintal nuai 5 vel hi sawrkarin Kg-ah Rs 20-in hnawhkhasak zel pawh ni se, sawrkar sum sen zat tur chu cheng vbch 100 vel a ni dawn tihna a ni. Chutih rualin sawhthing chingtute hian kum dang aiin an hlawkpui dawn lo tihna pawh a ni thei bawk ang. Quintal nuai 5 tal pawh hi sawrkarin a leisak theih loh phei chuan sawhthing chingtute dinhmun a tha lo hle dawn niin a lang.