Sawhthing lei tumte dawr an harsa – Agriculture minister

Sawhthing lei tumte dawr an harsa
– Agriculture minister
Mizoram sawhthing lei tumtu hnamdang sumdawngte an fin leh tanrualna avangin dawr an harsa a, man man taka loneitute sawhthing hralh sak tumin sawrkarin theihtawp a chhuah zel tih Agriculture & Farmers’ Welfare minister PC Vanlalruata chuan a sawi.
Assembly Session-ah zawhna chhangin minister hian, sawhthing chingtuten man man taka an hralh theihnan sawrkarin niloin support price pek a tiam a, nikumah sawhthing rate a chhiat em avangin a leisak ta mai zawk tih a sawi. Kuminah chuan sawrkarin ‘direct purchase’ hi a rem tawh loa ngaiin, sawhthing leitu turten an duh ang anga sawhthing chingtute an dawn hniam vak lohnan sawrkarin rate rualkhaia lei dan tur a ruahman a, chuti chungin hnamdang sumdawng, fing leh thiam tak an nih hlawm avangin dawn hniam an tum a, harsatna awm deuh mah se, sawrkarin theihtawp a chhuah a, a tha zawngin thil a kal zel niin an ngai tih a sawi.
Tunah hian Secondary Collection Centre (SCC) 64 awmah SCC pali – Cherhlun, Khuangleng, West Phaileng leh Tuipang SCC-ah chuan sawrkar floor price angin, support price pe in an kal mek a; Siliguri lamah kumdanga Mizoram sawhthing leitu tam ber thin chu inbiak pui turin Mizoram Agriculture Marketing Board member-te an thang mek tih a sawi bawk.
Sawhthing chingtute chu lo insum a, sawrkar ruahmanna leh hmalakna lo ngaichang thiam turin an ngen tih Agriculture minister hian a sawi a ni.