Sawrkar a thusawi anga a awm lohavangin MSU-in notification copy hal

Sawrkarin assistant professor atana tling a tih ang la nei pha lo chunga he hna thawk tura a lak lailawkte chu an thawh hun tura sawrkar sawilawk a zawh tawh hnu pawha pawhsei sak an la nih zel avangin Mizo Students’ Union chuan an duh loh zia lantirna atan an hna pawhsei sak an nihna sawrkar notification copy hi an hal.

Thawhlehnia Higher & Technical directorate office kawta notification copy an halnaah MSU Gen. Hqrs. hruaitute sawi danin, sawrkarin a rawih mek unqualified part time assistant professor 29 hi 2024 August 9 khan 2025 February 28 thleng chhawr chhunzawmna lehkha a lo tichhuak tawh a, chuta a inziah danah chuan, hemi bak hi chu an thawh hun chhung pawhsei sak tawh loh tur (no more extension of engagement will be done after 28.02.2025) a intih tawh hnuah kumin February 21 khan hun pek belhna notification a chhuak leh si tih an sawi.
MSU president B Lalkhawngaihzuala chuan, zirna tha siam tumin zirtirtu qualify lote sawrkarin a ruai reng hi hriatthiam har an ti a. Zirtirtu qualify loten zirna an pek theihna atana sawrkarin ‘humanitarian ground’ tia a chhawr hi humanitarian ground chhuanlama langsar taka dan bawhchhiatna a ni tih a sawi.
Kumin March 13-ah thuthar thehdarhtute kaltlanga he thil an duh loh thu an lo auchhuah pui tawh bakah H&TE minister hnenah vawi tam an thlen tawh a, June 9 khan chief minister hnenah an thlen tawh bawk tih sawiin, an thu thlenin awmzia a neih loh avang leh ngaihpawimawh a hlawh loh avangin notification order hi an hal tih a sawi a ni.
MSU hruaitute hian H&TE director hnenah ziakin lehkha an pe nawn a. 2025 July 6 ralhmaa an ngenna hi ngaihpawimawh a nih loh chuan zirlaiten zirtirna tha an dawn theihnan qualify ngei zirtirtu an duh thu Aizawl khawpuiah kawngzawhin tlangaupui an tum tih an sawi.