Sawrkar Company 4 te hi…
Nimin khan Committee on Public Sector Undertakings, Mizoram Legislative Assembly te chuan Chief Minister an hmu a, Mizoram sorkar hnuaia PSU palite chungchanga an thil hmuhte an sawipui a. Committee on PSU hian state danga PSU an kalpui dante an zir chiang a, an thil zir atanga ram tana tha ber tur nia an hriat ‘report’ an siam chu, kan hma lawka 9th Mizoram Legislative Assembly thutkhawm vawi 5-na, August ni 27 atanga neih turah pharh tura beisei a ni a.
Heng PSU – ZOHANDCO, MIFCO, MAMCO leh ZIDCO te hi Mizoram sawrkar Company kan ti ve mai ang a; an hming ang hian Mizoram thil deh chhuah chi hrang hrang, agriculture deh chhuah te, industry dehchhuah te, textile leh handicraft te, horticulture tharchhuahte tihhmasawnna tura thawk tur an ni a, a nihna takah chuan state sum lakluhna hnar pakhat ni ve thei tura duan an ni.
Mahse, vanduaithlak takin, heng sawrkar Company-te hian sawrkar hlawkna tur an thawk chhuak ngai mang lo va; thawh chhuah chu sawi loh, kum tina sawrkar sum ei hektu, hloh (Loss) hlira kal an ni, a tih theih mai awm e.
Sawrkar company pali zingah hian ZIDCO a upa ber a, kum 48-a upa a ni tawh a, a dawtah kum 38-a upa ZOHANDCO a awm leh a, beisei a pha lo a, thawkkhat lai phei kha chu an til ar ar hman a nih kha. MIFCO hi kum 37-a upa niin MAMCO hi kum 33-a upa a ni ve thung.
Comptroller and Auditor General of India (CAG) Report 2022-a kan hmuh ang chuan, kum 2022 hma lam kum 6 chhung khan, 2017-18-ah chiah PSU belhkhawmte hian hlep (profit) an siam ve a, chu chu cheng nuai 8 (0.08cr) a ni. Hei pawh hi ZIDCO leh ZOHANCO te pahnih chet that zar a ni a. An pahnih hian hlep cheng vbch 2.94 leh cheng vbch 1.66 an siam a, PSU dangte an chet chhiat em avangin an vaia belhkhawm hlep hi Rs 0.08 Cr chauh a nih phah ta a ni.
Sawrkar company-te hi state dang chuan an thatpui a, an tih dan te kan zir hial a nih hi! Kum kha leh chen kha sawrkar sum ei hektu an lo ni tawh thin a, tunah pawh an la ni reng tho a. Tuna sawrkar thar hnuaia Committee on PSU member-te hian engtin nge rawtna an rawn siam dawn tak(?) tih hi beiseina sang tak nena kan lo ngaihchan mek chu a ni ta ber e.