Sawrkar laipuiin ruihhlo dona tur sum Central YMA pe dawn
Sawrkar laipui chuan ruihhlo dona atan a tul anga hman turin Central YMA hnenah sum a pe dawn a, kar leh lamah pekchhuah hman beisei a ni.
Nilainia Aizawla Central Coordination Committee (CCC) vawi 104-na thutkhawmah Central YMA general secretary Prof Malsawmliana report danin, Mizorama Union Home minister Amit Shah a rawn zin tuma Central YMA hruaituten an lo hmuhnaah ruihhlo dona atana sum mamawh a nih dan an lo thlen a, hemi thu kalzelah Ministry of Social Justice and Empowerment atangin cheng vaibelchhe 2.3 a dawng dawn. Administration approval a awm tawh a, karlehah sanction chhuak beisei a ni tih a sawi.
CCC thukhawm hian YMA Inkhawmpuilian vawi 75-na Sakawrdaia hman zawh tak chu thlirlet a ni a. Sakawrdai khua in mikhual a thlen danah palaiten lawmawm leh nuam an tih thu sawi a ni. Rorel inkhawm erawh tun aiin palaiten ngaihpawimawh a ngai tih sawiin, inkhawmpui kal uar tura tan lak a ngai tih sawi a ni bawk.
Tunhnaia Red Bull Tlang Ruam Aizawla neih denchhena Mizo hnam lam – Cheraw duhdah taka hnamdangin an kan chu, CCC thukhawm chuan, kan hnam lam tihbawrhbanna a ni, tiin, tunhnuah hetiang hi thleng tawh lo se an duh tih an sawi.
CCC hian YMA Inkhawmpui liana thurel a thlifimin a siamrem thin a, heta an thurel hi Central Executive Committee bawhzui tur leh CEC paltlang leh tur pawh a awm thin tih sawi a ni.
CCC thukhawm thurel:
YMA Khawih –
# YMA inkaihhruaina leh nihphung leh hruaitute mawhphurhna, ram pumah inzirtir ni se. CEC-in ruahmanna siam se.
# Mizorama hnamdang sumdawng, phalna nei lo tam ta lutuk hi titlem turin YMA-in hma la se. CEC-in ruahmanna siam se.
# Mizo hmeichhiaten hnamdang pasal an neih zel lohnan Central YMA-in nasa zawkin inzirtirna kalpui se. Hmalak dan tur CEC-in ruahman se
# Mizo infiamna chawisan a nih theihnan Central YMA-in hma la se; CEC-in hmalakn dan tur lo ruahman se.
# Zohnahthlak chi peng hrang hrang Mizorama cheng zingah chi bil hmalakna a awm tawh lohnan Central YMA-in hma la se. CEC-in hmalak dan tur ruahman se.
Sawrkar Khawih
# Inner line permit (ILP) hi tun aia khauh leh awmze nei zawka kalpui a nih theihnan YMA-in sawrkarah thlen se. CEC-in ruahmanna siam se.
# Tui hnar humhalhna dan siam ni rawh se. CEC-in chak takin lo bawhzui se.
# Mizorama inkalpawhna kawngpui hrang hrang a chhiat avanga mipuiin harsatna kan tawk nasa lutuk thin hi a ziaawm theihnan Mizoram sawrkarin tun aia chak zawkin hma la se. CEC-in ruahmanna lo siam se.