Sawrkar sikul

Tun hnai khan school education minister chuan, nu leh paten fee tam tak senga trained teacher awm mumal lohna school-a an fate an kaltir thin chu mak a tih thu a sawi a, zirtirtu tha tak tak awmna leh, zirlaiten a thlawna engkim an dawnna hmun, sawrkar sikula an fate kaltir turin nu leh pate a sawm nghal a.
Minister-in a sawi ang hian, sawrkar sikulah chuan zirtirtute hi trained vek an ni a, naupang lehkha zirtir dan kalhmang zir chhuak vek an ni; an duh a, an tum phawt chuan, private sikul aia result tha zawk nei reng thei an ni. Chutih rualin, sawrkar sikul chuan hmunhma a nei tha zawk a, facility engkim a changtlung zawk bawk a. Hetianga enkawl sikulah, nu leh paten an fate an luhtir lo hi chu mak tih awm reng pawh a ni.
Mahse, nu leh pate hi an mak lo; sawrkar sikul hi a maka zawk chu a ni. Trained teacher nei zawk sikul ten an zirlaite result tha an neihtir theih loh miau chuan, hamthatna tha tak tak thlahlel thei lovin, private sikul an pan tawk tawk a ni ber; demna tur a awm hran lo.
Zirlai nu leh pate hian sawrkar sikul result a that hunah ihe lovin an fate an luhtir ngei ngei ang tih a rinawm. Delhi sawrkar pawhin sawrkar sikul dinhmun a chawi kang a, result tha tak an nei a, zirlai nu leh pate pawh sawrkar sikula an fate luhtir theih loh hlauvin an hmanhlel tawh mai a ni.
Mizoramah pawh hian, sawrkar sikul result a that hunah chuan, sawrkar sikula an fate luhtir tura nu leh pate hi sawm vak vak an ngai hranin a rinawm loh. Private sikulte pawh hian nu leh pate hi an sikula lut turin an sawm hran lo, mahse sawrkar sikul aia result a that miau avangin an pan zawk mai thin a ni.
A nihna takah chuan, sawrkar sikula zirna a that loh avanga nu leh pa harsa te te ten harsa tak chunga private sikul an pan chhan hi sawrkarin a tihtur a tih tawk loh vang a ni ber a, sawrkar hian nu leh pate harsatna a thlentir a ni deuh ber awm e. Sawrkar na na na chu, a tum phawt chuan private sikul lehpel turin theihna a nei; tum leh tum lohah a innghat vel mai mai a ni.