Sawrkarin a bawhchhe zawk em?

All Mizoram CSS Employees Coordination Committee (AMCECC) chuan an dinhmun nghet zawka siam ve tura Mizoram sawrkar an phut mek tihhlawhtlin ngiatin April 15-17 chhung awh tur Pen/Tool Down Strike an kalpui mek a.
Hetih lai hian Mizoram sawrkar chuan a hnuaia thawktuten lungawilohna an lantir dawn chuan sawrkar dan neih mek tlawhchhanin, ‘hna thawh loh chuan hlawh hmuh loh’ (no work no pay) thuchhuah a siam khum ve nghal a.
AMCECC-in lungawilohna an lantir chungchangah, nimin khan Chief Secretary charge la mektu chuan Press Conference neiin, CSS hnuaia dan loa lakte chu dah ngheh theih an nih loh thu leh, AMCECC thil phut an tih hlawhtlin chuan India Constitution bawhchhiat a ngaih tur thu a sawi a. “CSS employee te hi direct quota hnuaia dah ngheh (regularize) tur an nih avang hian, lak an nih dawnah hian fair takin, dan pangngai ang thlapa lak an nih a ngai a, Article 14&16 of the Constitution-in hei hi a phut tlat a, bawhchhiat a thiang lo..” tiin a sawi a.
Regularisation atana tul leh pawimawh dan tesep hrang hrangte chu chipchiara helaia tarlan sen hi a ni lo a; mahse, helai thu, “…lak an nih dawnah hian fair takin, dan pangngai ang thlapa lak an nih a ngai a, Article 14&16 of the Constitution-in hei hi a phut tlat a, bawhchhiat a thiang lo..” tih thu te mai hi a pawimawh ta tlat a ni.
CSS Employees te hian dan lova lak kan awm kan hre lova, sorkar appointment order mumal tak nei veka lak kan ni, dan dik loa lak kan awm a nih chuan dan loa min latu chu sorkarin chhui chhuakin, a mawhphurtute chungah na taka hma la turin kan phut, tiin nimin khan emergency meeting neiin thuchhuah an siam ve nghal a.
Sawrkar berin dan lova a hnathawkte a lo la a nih chuan, fair taka thil ti tura phuttu bawhchhiat thiang lo Danpui Article 14&16 hi, sawrkar hian a lo bawhchhe ta zawk mai em ni? tiin a zawh let theih awm e.
Eng pawh ni se, ram inrelbawlna kal mekah, state hmasawnna hna thawktu leh ram leh hnam tana kut ke pawimawh tak CSS Employees te hi sawrkar lam pawh hian, ‘kan ti thei alawm’ tia invaivung khum mai lovin, pa chan chang takin, an harsatnate sutkiansak turin dawhkan khat kilpui thei se a duhawm khawp mai.