Sawrkarin Mizo tobul mumal tak a la puang lo hi a veiawm – Art & Culture minister

Sawrkar angin Mizo tobul leh thlangtlak dan kimchang mumal taka puan a la ni lo chu veiawm a tih thu Art & Culture minister C Lalsawivunga chuan a sawi.
Pachhunga University College-a Department of History leh Art & Culture department tangdun buatsaih Mizo tobul chhuina, ‘International Symposium on Mizo Origin: Exploring Narratives of Origin and Migration’ chu Zirtawpni khan PUC campus-ah neih a ni a.
Hmanpuitu minister hian Mizo tobul leh thlangtlak danah historian-te chhuizauna atangin thil hriat leh hmuh tur hrang hrang awm bawk mah se, sawrkar anga Mizo tobul leh thlangtlak dan kimchang mumal taka puan a la ni lo chu veiawm a tih thu a sawi a. Ziaktu hmasate inpekna avanga Mizo chanchin hriat tur a awm chu lawmawm a tih thu sawiin, tunhnaiah thangthar zingah Mizo chanchin chhuichian duhna, Mizo tobul leh thlangtlak dan kimchang hriat duh an awm chho zel chu lawmawm a tih thu a sawi a ni.
Zohnahthlak hnam peng hrang hrang tobul, thlangtlak dan leh khawsak zui zel dan dik taka kan hriat theih nan dawhkan atang mai ni lo, uluk taka chhui turin a hmuna kalchilha zirchian a pawimawh tih C Lalsawivunga hian a sawi a. “Sawrkar ang pawhin kan tobul leh thlangtlak dante kan neih a hun tawh a, hemi atan hian historian hmasaten sul an lo su tawh a, hemi behchhan hian tun aia fiah leh chiang lehzualin ziak ngeia dah theih tura tan lak a tul a ni,” a ti.
Symposium-ah hian resource person-ah ‘Hmasang Pipute Chanchin’ tih lehkhabu ziaktu Liandova (Dadova), Letpanchaung Myanmar chuan Mizo tobul chhuina leh thlangtlak dan presentation a pe a ni. Resource person thusawi behchhan hian, thlirna tlang dang atanga ngaihdan hrang hrang awm theite – freelance researcher Michael Lalthanmawia, author & novelist C Lalnunchanga (Taitea) leh MZU-a Department of History and Ethnography associate professor Dr Lalrinnunga Hmar ten an sawi bawk a; zawhna awmte chhan a ni.
Symposium-ah hian Mizo history lama tuimite, college zirtirtu leh zirlaite an tel.