SBI ngenna Congress ten dodal na hle

Congress te chuan March 5 khan Centre chu nataka beiin State Bank of India (SBI) chuan Supreme Court hnenah electoral bond details pholanna turin hun tam zawk pek a dil an ti a, hei hi Modi sorkar in India rama bank lian ber chu diklo taka an thiltih te thup nana an hman a nih zia a pholang tiin a sawi.
SBI te chuan March 4 khan Supreme Court hnenah political party tena electoral bond an neih kimchang te pholang tura a tih chu June 30 hma chu pholan tirloh phal turin a ngen a. Court chuan a hma in SBI te chu March 6 hma ngeiin electoral bond neitute chu Election Commission hnenah a kimchang pe vek turin a lo ti tawh a ni.
Congress president Mallikarjun Kharge chuan electoral bons cheme a Congress dinna chu ‘langtlang lo, democratic kalh leh level playing field tichhe tu’ angah an ngai tiin a sawi a.
“Modi sorkar hian India rama kan bank lian ber chu Electoral Bonds kaltlangin dik lo taka a thiltih thup nan a hmang a ni” tiin Kharge chuan a sawi a.
“Supreme Court of India chuan Modi sorkar black money conversion scheme Electoral Bonds chu constitution kalh leh RTI kalh leh dan kalh tia sawiin a lo hnawl tawh a, SBI pawh donor details chu March 6 a thehlut hman turin a lo ti tawh a ni” tiin Kharge chuan a sawi a.
“Mahse BJP te chuan chu chu Lok Sabha inthlan zawh hnuah tih an duh a ni. Tun Lok Sabha hun hi 16th June ah a tawp dawn a, chumi hnuah 30th June ah data te chu SBI in share chauh se an duh a ni. He inbumna scheme a hlawkna tel nasa ber chu BJP te an nih tlat vang a ni” tiin a sawi.
“Sorkar hian zei takin BJP tena uchuak taka highways, ports, airports, power plants etc a contract an pek dan an thup tlat a, chung contract te chu Prime Minister Narendra Modi crony te hnenah thup theih electoral bonds hmangin pek an ni” tiin a sawi bawk.
“Mithiam te chuan donors 44,434 automated data chu darkar 24 chhung leka tihfel vek theih an ti a. Eng vangin nge SBI hian chu information nei tur chuan thla li chuang a mamawh” tiin zawhna a siam bawk a.
“Congress party chuan chiang takin Electoral Bonds scheme chu langtlang lo, democractic lo leh level playing field in ang lo zunga siam a ni a ti a. Modi sorkar, PMO leh FM te hian institutiton tin – RBI, Election Commission, Parliament leh Opposition te thlengin BJP sum bawm tihkhah nan an suasam vek a ni” tiin Kharge chuan a sawi bawk a.
“Tunah Modi sorkar mangang chuan theih palingkawh chhuahin SBI chu Supreme Court judgement suasam nan hman a tum leh mek a ni” tiin Kharge chuan a sawi bawk.
Congress MP Manish Tewari pawhin sorkar chu sawiselin Supreme Court chu SBI ngenna remtihsak lo turin a ngen zui bawk a. “Lok Sabha inthlanpui neih hma ngeiin mipui ten tu ten nge khawi atangin nge sum an neih an hre ngei ngei tur a ni” tiin a sawi a/
“Supreme Court hian sumdawng lian te inthupna electoral trusts hi lailangin donor te nihna dik tak a pholang tur a ni” tiin Tewari chuan a sawi bawk.
Congress leader Rahul Gandhi pawhin sorkar chu nataka sawiselin Lok Sabha inthlan hma ngeia Prime Minister Narendra Modi hmel dik tak lanna thup a nih theih nana hmalakna hnuhnung tiin a sawi bawk a.
“Narendra Modi hian a sipai zawng zawng te chu a ‘donation business’ thup a nih theih nan a hmang mek a ni. Supreme Court in ram mipui ten electoral bonds nihna dik tak an hriat chu an rights a ni a tih laiin eng vangin nge SBI in chu information chu inthlanpui hmaa tihchhuah a duh loh?” tiin Congress chief hlui chuan a sawi bawk.
SBI te chuan court a ngenna an siamah information tin te hmun khata dah leh hmun danga mi te nen a inmil em tih enfiah vek tur chuan hun a duh rei dawn a ni tih chu chhuanlama an hman a ni a. Electoral bonds leitute nihna dik tak chu thup a nih tlat avangin electoral bonds leh donation petu donors te nihna finfiah tur chuan hun a duh dawn a ti a ni.
February 15 khan sorkar tana pawi tak turin Supreme Court chuan political funding atana electoral bond scheme chu a nuaibo a, a nuaibo chhan a sawiah Constitutional rights to freedom of speech leh expression bakah right to information a kalh a ti.
Thupek a siamah Court chuan Lok Sabha inthlan hma ngeiin SBI chu electoral bond scheme kimchang leh contributor tin te chu Election Commission hnenah pe vek turin a ti bawk a.
Five-Judge Bench Chief Justice D.Y. Chandrachud kaihhruai chuan SBI chuan poltuiical party te hnena electoral bond pek tin te chu a pholang vek tur a ni a. Sum pek a nih ni leh bond denomination tin te chu March 6 hma in Election Commission of India hnenah a kimchanga pe vek turin a ti a ni.