SC-in electoral bond scheme a hnawl

Supreme Court chuan Electoral Bonds Scheme chu constitution kalh a ti ta a. He scheme-ah hian donor hming thup chu langsar lai ber niin chu chu transparency activists tena an sawisel nasat lai ber a ni bawk. Heng bonds te hi kum 2018 atanga political party tena sum neih nana an hman ber a ni a. Court chuan he scheme hian political party ten khawi atangin nge sum an neih an hriat duha an hriat theihna right to information a bawhchhia a ti a. Scheme hmanga sum thawh tu, a dawngtu leh sum engzah nge tih te chu pholang vek turin a ti bawk.

A scheme kha?
Electoral bond chu promissary note ang tho niin mahse banking instrument a leitu leh a petute hming lang si lo a ni. Khua leh tui tu pawh emaw company ten heng bonds te hi denomination Rs 1,000, Rs 10,000, Rs 1 lakh, Rs 10 lakh leh Rs 1 crore a lei theiin chu chu political party hnenah an pe thei. Authorised bank in bank account kaltlang chauha thawh theih niin State Bankf of India chu heng bonds te suma chantir theitu awm chhun a ni.

Scheme a thil thlak danglam te?
A hmain Section 13A of the Income Tax Act chuan party te chuan contribution an dawn Rs 20,000 chunglam chu an chhinchhiah thlap tur a ni a ti a. Finance Act 2017 chuan hei hi amend thungin electoral bonds kaltlang chuan a ngai lo a ti a. Chuvang tak chuan party te chuan bonds hmanga an dawn te chu an chhinchhiah a ngai ta lo a ni.
A hma chuan Section 29C of the Representation of the People Act (RPA), 1951 chuan party te chuan mimal emaw company hnen atangin financial year chhunga sum Rs 20,000 chuang an dawng a nih chuan report an siam tur a ni a ti a. Chu pawh chu kum 2017 khan amend niin chu mi vang chuan report siam tur zingah electoral bonds atanga sum dawn te chu a huam tel lo leh bawk. Under Section 182(3) of the Companies Act hmangin company te chu political party hnena an sum pekte tarlang vek tura tih an ni a, party hming mai bakah an profit-and-loss account thlenga report vek tura tih an ni a. Mahse, amendment siam a nih hnuah chuan financial year khata party te hnena an sum pek chu report a ngai ta lo bawk a ni.

Sorkar-in court-a a tan dan?
Sorkarin electoral bonds scheme a tan dan ber chu miin political party a duhsakte hnena banking channel hmanga sum a pekin sumfai thunun hleih theih loha a pek tur a veng a ni an ti. Hming tarlan loha peka confidentiality kalpui a nihin political party-ah pawisa thianghlim a lut a ni a ti bawk a. Banking channel kher hman chuan election funding-a black money inrawlh theihna dang bawkin a thawhtu donor chuan party an puih ve lohte laka inthlahrunna leh nawrna awm thei lakah a veng a ti bawk. Sorkar chuan arguments a neihah khua leh tui te chuan political party-a fund petute hriat vek tura general right a nei lo a ti bawk a.

Supreme Court thutlukna siam dan?
A hmaa judgement a lo siam tawhah apex court chuan voters te chuan zalen taka vote an thlak theih nan right to information an nei a ni a ti a. Court chuan political party tena fund an hmuh information te chu voter ten zalen taka vote theihna an neih zinga pawimawh a ni a ti bawk a. Electoral Bond Scheme chuan chu rights chu bawhchhiain hming tarlan loh hmangin bond hmangin party-ah sum a thawh thei a ni, a ti a, chu chuan Article 19(1) freedom of expression chu a bawhchhia a ni, a ti.
Black money a ti tim tia sorkar tanna chu court chuan proportionality test a pawimawh a ti a. Voters tena right to know an neih chu donor anonimity hmangin khuahkhirh a ni em a ti bawk a. Contribution tlem nei duhte tan duhthlan tur dang electronic transfer leh donation liantham pe duh tan Electoral Trusts hman theihin a awm reng tho a ti bawk a. Hei vang hian IT Act leh RPA te chu constitution kalh a ti ta a ni.
Companies Act thlak danglamah pawh court chuan sum thawhtute thawh dan kimchang tarlan loh tih chuan voters te right to information a kalh a ti bawk a. Scheme chuan profit-making leh loss-making company ten political contribution an tih a remti ve ve bawk a. Tun hma chuan company te chu an net profit atanga percent bithliah siam chauh an pe thei a. Hei vang hian Companies Act amendment siam chu thleibik nei tiin India rama court sang ber Supreme Court-a Five-Bench Constitution Bench chuan a sawi.