SC-in EVM-a thuremna la puang duh rih lo

Supreme Court chuan Election Commission of India hnenah Electronic Voting machines (EVMs) chung changah zawhna panga zawtin chung zingah chuan microcontroller te chu reprogrammable a ni em tih te pawh a tel.
He case hi judgement siam nana reserve a dah tawh a ni chungin Bench of Justices Sanjiv Khanna leh Dipankar Datta te chuan EC chu zawhna hrang hrang an zawt leh ta a ni.
Nilaini khan Justice Khanna chuan Election Commission leh petitioner te awm laiin open court-ah zawhna panga a chhiar chhuak a. Chung zingah chuan Voter Verifiable Paper Audit Trail (VVPAT) control unit ah microcontrollers te dah a ni em tih a tel a. “EVMs control unit-ah microcontroller dah ni ngeiin a lang a ni” tiin Justice Khanna chuan hriatchian a ngiat a ni.
Pahnihnaah chuan court chuan microcontroller dah chu “one-time programmable” a ni em tih a ni bawk a. Zawhna pathumna chu court chuan Election Commission chu Symbol Loading Units engzah nge awm a zawt bawk a. Palinaah, bench chuan EVMs dahthat chu ni 30 chhung tih a nih thu sawiin chhiar that ngai leh se EVMs te chu hmun himah seal thlapa dah a ni tih a ni bawk a. “Mahe, Section 81 of the Representation of People Act chuan limitation period chu ni 45 a ti sia a ni. Hei hi sawichiang turin kan ngen che u a ni” tiin Justice Khanna chuan senior advocate EC aiawha ding Maninder Sigh hnenah a sawi bawk a.,
Zawhna hnuhnung berah Supreme Court chuan EVM chuan component pathum – ballot unit, control unit leh VVPAT a nei a. Heng te hi a huhovin seal thlapa dahthat a ni em? tiin Justice Khanna chuan a zawt bawk.
Hei hi chhangin ELection Commission of India chuan EVMs unit thum – Ballot Unit, Control Unit leh Voter Verifiable Paper Audit trail te chuan a hrang theuhin microcontroller an nei vek a ti a, hei bakah hian Commission chuan one-time programmable vek an ni a ti bawk.
ECI officer chuan EVMs leh VVPATs te chu inthlan zawh atanga ni 45 chhung dahthat an nih thu a sawi bawk a. A hun liam tawh hnuah Chief Electoral Officer te chuan High Court hrang hrangah election petition a awm leh awmloh a zawt a. Petition a awm lo a nih chuan storage atanga lakchhuah a ni chauh thin tiin ECI chuan a sawifiah bawk.
ECI officer chuan inthlan hmain VVPATs leh EVMs te chu a hranpaa dah hran a ni a ti tawh a. Inthan zawh hnuah chauh unit anga dahkhawm a ni a ti bawk a. Commission a nih veleh unit pathum te chu seal nghal a ni a ti bawk a. Inthlan zawhah EVMs leh VVPATs te chu seal that leh niin electoral officer signature pawh record thlap a ni tiin top court hnenah a sawi bawk.
Officials te chuan court hnenah EVM a ballot flash memory ah symbvol 1,024 chuang a dah theih a ti bawk a. Software ni livin symbol chauh EVMs ah store theih a ni a ti bawk.
He thubuai hi petitioner ten EVM leh VVPAT chhiarah 100% cross-verification tih ni se tia an ngiatna a ni a. Tun dinhmunah chuan EVM-VVPAT cross-examiation hi constituency a polling booth pangaah kalpui a ni chauh a ni.
Petitioner Association for Democratic Reforms leh Arun Agarwal te chuan India rama voter 97 crore te chuan electoral system langtlang zawk an phu a ni an ti a. Advocate Prashant Bhushan leh senior advocate Gopal Sankaranarayanan te petitioner aiawha ding te chuan vote thlak tu in a vote thlak duhna ngeia a thlak chu a fundamental right a ni an ti a.
Petitioner te chuan EVMs an ringhlel tihna ni lovin an sawisel ber chu EVM system chuan voters te chu an vote duhnah ngei an thlak a ni tih finfiahna emaw chiang taka hrilhna a nei lo an ti a.
Voter te chuan button an hmet a, khawl chuan an vote chu an duhnaah tak a thlak kher em tih finfiahna a pe lo va, VVPAT machine chuan vote thlak hnuah second sarih vel chhung mit khap kar lek an vote na a tilang zuai chauh a ni an ti bawk a.
Bhushan chuan paper ballot hman leh a, VVPAT slip chu voter te hnenah pek ni se voter ten ballot box ah thlak leh se, VVPAT screen chu langtlang veka siam ni se, EVM leh VVPAT count chu ainmil em tih booth tinah chhiar ni se a ti bawk a ni.
Election Commission thung chuan EVM te chu ‘perfect’ tia sawiin tihbuai theih a ni lo a ti bawk a. Election Commission of India chuan Supreme Court chu engti kawng mahin electronic voting machines chu tihbuai theih a ni lo tih a hrilh a ni an ti ve thung.
Election Commission of India te insawithiamna a ngaihtlak hnuah Supreme Court chuan thubuai a ngaihtuaha thutlukna nakina siam atan a dahtha leh ta rih a ni.