SC-in lungawilohna lantir remti

Supreme Court chuan Maharashtra a college professor-in Article 370 nuai bo ‘black day’ tia a sawi leh Faculty leh parents te awm tlanna WhatsApp group-a Pakistan mipuite lawmpuia ‘happy independence’ tih a post avanga inhuatna leh lungruallohna tuh a tum tia a laka FIR thehluh chu a hnawl.
“Article 370 nuaibo ni ‘Black Day’ tia sawi chu lungawilohna leh lawmlohna lantirna a ni a. Dan kalh hauh lova lungawilohna lantir chu Article 21 of the Constitution in zahawm leh awmze nei taka nun hman remtihna a pek zinga tel tlat a ni” tiin Justice A.S. Oka, Division Bench kaihruaitu chuan judgement a siamah a sawi a.
Justice Oka chuan professor Javed Ahmed Hajam an Article 370 nuaibo a duhlohna lantirna lungawilohna mawlmang taka a kalpui lakah police ten Section 153A (promoting enmity among different classes of people) of the Indian Penal Code an hmang ngawt thei lo a ti bawk.
Section 153A hmang tur chuan mipui nawlpui te lakah huatna tuh tuma chetlakna lam a awm ngei a ngai a. He provision hi lungawilote hmehmih nana hman tur a ni lo, a ti bawk.
“Constittion chuan freedom of speech and expression min pe vek a. Khua leh tui tute pawhin Article 370 nuai bo chu an sawisel thei a, State thutlukna siam tin pawh an sawisel thei. Sorkar thutlukna siamah a lungawilohna a sawi chu a right a ni” tiin Justice Oka chuan a sawi bawk.
Hajam hi Jammu and Kashmir chhuak niin mahse Kolhapur a Sanjay Ghodawat College a zirtir hna thawk niin Court chuan Pakistan mipuite independence cham lawmpuina a thawn chu a duhsakna a lantir a ni mai a ti bawk a.
“Khua leh tui tin ten ram dang khua leh tui te an Independence Day ah lawmpuina an thawn thei a lawm, India khua leh tui ten August 14 Pakistan Independence Day a lawmpuina an sawi a nih pawhin eng mah dik lo a awm lo, duhsakna lantirna a ni,” tiin Justice Oka chuan a sawi bawk.