SC judge parukin Manipur tlawh dawn

SC judge parukin Manipur tlawh dawn
Supreme Court judge parukin Manipur-a chi leh chi inkara buaina chhuak avanga relief camp-a awm mekte chu Inrinni hian an tlawh dawn tih National Legal Services Authority (NALSA) chuan a puang a. ‘Dan anga thil tih leh puihna tam zawk’ a awm theih dan tur an en ang.
Judge parukte hi NALSA Executive Chairman Justice BR Gavai-a hovin Justice Surya Kant, Justice Vikram Nath, Justice MM Sundresh, Justice KV Viswanathan leh Justice N Kotiswar Singh te an ni ang.
May 3, 2023-a buaina a chhuah atanga kum hnih dawn a liam hnuah mi za chuang thi tawhin mi 50,000 chuang chu Manipur hmun hrang hranga relief camp-ah an la awm tih NALSA chuan a sawi a. Supreme Court judge-ten an tlawhnaah hian dan anga thil tih an mamawhna leh puihna an dawn dan an en dawn a ni.
Justice Gavai-a chuan ral atangin district tinah legal service leh medical camp a hawng nghal ang a. Imphal East, Imphal West leh Ukhrul district-ah legal aid clinic a hawng dawn bawk a. Puihna thil an sem bawk ang.
NALSA chuan legal services camp hi baihvaia awm mekten sorkar atanga hamthatna awmte an pawh theihna tur leh puihna pawimawh zual – damdawi, pension, employment scheme leh identity document siam thar leh te tihna tur a nih thu a sawi.
NALSA chuan Chennai atanga kal doctor thiam bik 25-ten relief centre zawng zawngah medical camp an buatsaih dawn tih a sawi a. Judge-te haw hnuah pawh ni ruk chhung chu damdawi sem leh damlo enkawlin an la awm zui dawn bawk.
Manipur-a buaina chhuakah hian NALSA hi a tuartute dan hmanga puihnaah a thawh hlawk hle a. Relief camp-ah special legal aid clinic 273 buatsaih tawhin baihvaiten sorkar atanga hamthatna awmte an hmuh phah a, an lehkha bote nei thar lehin damdawia puihna pawh an dawn leh phah hlawm.
NALSA hi November, 1995-a Legal Services Authorities Act, 1987 tlawhchhana din niin India ram puma legal services institution kal dan leh dan anga puihna tha taka kalpui a ni em tih viltu an ni.
Manipur High Court pawhin March 22 hian an kum 12 dana an hun hman thin an hmang dawn a, hei hi Supreme Court judge-ten relief camp an tlawh ni tur a ni.
Manipur-ah hian Meitei tamna, phaizawl leh hnam hrang hrang tam tak, Kuki an tihte chenna tlangram awmin May, 2023 khan an inmil lohna hrang hrang avangin an intibuai.
General category-a awm Meitei-te hian Scheduled Tribes category-a telh an duh a, Myanmar-a Chin State leh Mizorama chengte nena inkungkaihna nei, Kuki-te hian an awm ve duh lo va, inrelbawkna hran an ngiat a. Tuna an awm danah hi chuan en hran an ni tih an insawi.