Scho’ pechhuak turin tih ngai tifel

Scholarship pekchhuah kawnga Mizoram sawrkarin harsatna a neih chu sawrkar laipuiin a chinfel sak a, October thla chhunga pekchhuah kim beisei a ni.
Mizo Students’ Union thuchhuak chuan, Mizoram-a zirlaite tana sawrkar laipui Ministry of Tribal Affairs-in kumin July 7-a scholarship atan sum a rawn sanction tawh, Mizoram Finance department-in SNA SPARSH a lo hman tawh avanga sum a dawn theih loh reng hnu in, system hlui anga Finance ministry-a Mizoram Finance commissioner-in kumin September 2-a DO letter hmanga exemption a zuk dilna chu September 15 khan sawrkar laipui hian exemption a rawn pe tih a sawi.
Scholarship bik atana exemption hian kumin October 31 thleng a awh dawn a. Sawrkar hotute atanga an thu hriat danin, sum dawnna tur ber a fel tawh chuan October ralhma ngeia scholarship semchhuah hman beisei a ni tih a sawi a ni.
Scholarship bik atana state sawrkarin a tum ve tur, state matching share cheng nuai 560 pawh kumin August 19 khan administrative approval leh expenditure sanction pek a ni tawh tih an sawi bawk.