SD 2.0 chhawr \angkai tawh ila…

Ministry of Tourism-in khualzinte atanga sum lakluhna tura scheme a siam Swadesh Darshan 2.0 (SD 2.0) hnuaia India ram state leh UT hrang hrang 33-a project 57 kalpui turah Mizoram chuan project pahnih chang vein hei hi Aizawl leh Champhai district-ah kalpui a ni dawn a. Nimin khan hemi chungchangah hian Champhai district bika SD 2.0 kalpui dan turah district bawrhsap hovin inrawnkhawmna neih a ni a. Swadesh Darshan 2.0 hian khuarel mawina humhalh chunga khualzin hip luh chu a thil tum a ni.
Kan hriat angin, kum 2015-16 leh 2016-17 chhung khan Mizoram chuan Swadesh Darshan 1.0 hnuaiah project pahnih a hmu a. Project pakhat zawk, North East Circuit 2015-16, “Development of Thenzawl & South Zote, District Serchhip and Reiek” kha tha taka kalpui a nih laiin, project pakhat zawk – Eco Circuit 2016-17, Development of Eco Adventure Circuit Aizawl -Rawpuichhip – Khawhphawp –Lengpui – Chatlang, Sakawrhmuituaitlang- Muthi –Beratlawng -Tuirial Airfield – Hmuifang… tih kha erawh chu tun thleng hian zawhfel lohin a la awm hlawm a. Ministry of tourism website lama a lan dan chuan, NE Circuit project atan cheng vbch 92.26 sanctioned niin hei hi released vek a ni a, vbch 90.24 hman niin physical status-ah complete tih a ni.
Pakhat zawk Eco Circuit-ah cheng vbch 66.37 sanctioned niin released zat chu vbch 49.53 a ni a; hei hi hman zawh vek a ni a, hna thawh zat physical status chu 56.35% a ni. Hei hi ni 28, Feb 2023 thlenga record dan a ni.
He record atanga a lan danah hi chuan pawisa sanctioned zat atanga 74.6% released a ni a, chu chu hman zawh vek niin hnathawh zat chu 56.35% chauh tihna a ni. Hna thawh tur la awm 43.65% hi pawisa la hmuh tur zat 25.4% hmanga thawh zawh tur tihna a ni. Eco Circuit project hnuaia component 10 te hi a enga mah thawh zawh awm si lovin, thubuai avangin thawh chhunzawm theih lohin a la awm zui a ni.
Hetianga tarlan duah a nih chhan chu, SD 1.0 kan lo kalpui tawhah a nihna tur anga chhawr tangkai theih loh tur kan hnutchhiah hnem em avangin, tuna SD 2.0 notified tawh Aizawl leh Champhai district-a project kalpui turte hi a hlawhtlin ngei ngei theihna tura tun atanga tihtakzeta tan kan lak a ngai a. A kaihhnawih department leh a cover tur district mipuiten thawhhona tha tak nei tura tun atanga kan lo inruahman lawk a pawimawh dawn hle tih hun kal tawha kan tawnhriat atangin a lang thei a ni.