SDG tihhlawhtlinah a vawi khat nan a tha 100 zingah India te

SDG tihhlawhtlinah a vawi khat nan a tha 100 zingah India tel
India chu Sustainable Development Goals tihhlawhtlin kawngah ram 193 zinga a titha zual 100 zingah a vawi khat nan a tel ve ta a, report thar ber hi Thawhlehni khan tichhuah a ni.
UN Sustainable Development Solutions Network-in a vawi 10-na leh Sustainable Development Report a tihchhuah thar berah hian India hi 2025 SDG Index-ah 67 hmuin 99-naah a awm a, China chu 49-na niin 74.4 a hmu a, US chu 44-na niin point 75.2 a hmu.
India thenawm zingah Bhutan chu sang berin 74-na a ni a, point 70.5 a hmu a. Nepal-in 85-na hauhvin 68.6, Bangladesh-in 114-na hauhvin 63.9 leh Pakistan chu 140-na niin point 57 a hmu.
Tuipuia a thenawm hnai, Maldives leh Sri Lanka chu 53-na leh 93-na an ni bawk.
Report siamtute chuan khawvel pumah SDG kalpui hi a chawl tih tar langin UN member ramten kum 2015-a kum 2023-a tihhlawhtlin an tum 17 zinga 17% chauh tihhlawhtlin a la ni tih an sawi.
“Buaina, dinhmun derthawnna hrang hrang leh kum khat chhunga sum hman tur tam tawk loh vangin khawvel hmun hrang hrangah SDG kal hi a muang rih mek,” tiin a ziaktute hotu ber, economist hriat hlawh, Jeffrey Sachs-a chuan a sawi.
European ram, a bikin Nordic ramte chu SDG Index-a a sang ber ber hauhtu niin Finland-in a chung ber luahin Sweden leh Denmark ten an dawt.
A sang zual 20 zinga 19 chu Europe-a mite an ni.
Report siamtute chuan heng rangte hian tihhlawhtlin tum zinga pahnih ve, sik leh sa leh khawvela cheng thil nungte inkungkaihna tihthat kawngah beih tur harsa an nei ve lo niin an tar lang.
Asia khawchhak leh chhim lama ramten SDG hi an tihlawhtling chak lo tlangpui a, hei hi an rama thil inthlak chak lutuk vang a ni ber.
Heng lai hmuna awm zingah chuan kum 2015 hnu lamah Nepal, Cambodia, Philippines, Bangladesh leh Mongolia te chu a titha zual an ni a. Anni bakah hian khawvel hmun dangah chuan Benin, Peru, United Arab Emirates, Uzbekistan, Costa Rica leh Saudi Arabia te chu thil tum tihlawhtling chak an ni.
Ram titha awm mah se khawvel pumah tihhlawhtlin tura tuk zinga 17% chauh tihhlawhtlin a la ni a, UN member ramte hian ni tin khawsak nana mamawh thil – mobile broadband hman, electricity, internet hman, kum nga hnuai lam thihna tihtlem leh piang hlim thihna tihtlem kawngah deuh chauh hma an sawn a ni.
Kum 2015 dinhmun atanga thlirin khawvel ramte hi thau lutuk tam tihtlem, chanchinbumite zalenna pek, nitrogen enkawlna rintlak siam, Red List Index leh Corruption Perceptions Index-ah a hnungtawlh zawngin an kal hlawm.
Report thar ber hi Seville, Spain-a 4th International Conference on Financing for Development neih hman lawka tihchhuah a ni.