Season tawpa chawl tur Okazaki

Leicester City forward hlui leh Premier League title winner ni bawk Shinji Okazaki chuan tun season tawp ruala football khelh a chawlhsan tur thu a puang.
Kum 37 mi hian kum 2015 nipui laiin Leicester kha a zawm a, a debut season-ah goal nga khungsakin, Italian manager Claudio Ranieri hoa Foxes-in beisei loh taka Premier League title an lak kum a ni chiah nghe nghe.
Okazaki hian belhkhawmin Foxes tan match 137-ah goal 19 a tilut tling a, tunah Japan international hian Belgium club Sint-Truiden tan khel mekin, season tawp rual hian football khelh a bansan ve tawh dawn ta a ni.
Okazaki hian Instagram kaltlangin a chawlh tur thu hi a puang a, “Tun thleng hian footballer ka nihna zawnah ka engkim ka hlan vek a, ka taksa leh ka rilru a tlahrang ta tih ka hrechhuak a, a tawp ka thleng ve ta a ni,” a ti.
Hliamin a tihbuai fo avangin Okazaki hian tun season Jupiler Pro League-ah a club vawn lai Sint-Truidense tan match nga chiah a la khel a, nikum December ni 16 atang khan a la inkhel leh ta lo.
Okazaki hian Japan tan game 119-ah goal 50 thun tlingin, Japan all-time scoring list-ah pathumna a ni pha a; kum 2011 khan Asian Cup-a champion Japan team zingah telin, ram tan World Cup vawithumah a inlan tawh bawk.
A professional career a tanna chu an ram club Shimizu S-Pulse niin, a hnuah Europe a pan a, kum 2011 khan Bundesliga club Stuttgart a zawm.
Chu ta tangin kum 2013 leh 2015 chhung khan German club dang Mainz tan kum hnih a khel a, Leicester lama a insawn hnuah Premier League title a lakpui tum khan inelna hrang hrangah match 36 a khel tling.
2018-19 season tawp rual khan a contract neih lai hmang zoin Okazaki chuan Leicester a chhuahsan a, free agent ni chungin Spanish club Malaga a zawm.
A club tharin hlawh an pek leh theih dawn loh avangin ni 34 lek hnuah a contract chu an titawp zui leh ta mai a, Malaga tan a khel hman lo.