Secular Alliance siamin ziakin thawhhona nemnghet

Sakhaw zalenna leh ram leilungfate humhalhna atan political party pathum chuan thawhhona an siam chu ziakin an nemnghet.
Congress party bultumin Zirtawpni khan Aizawlah ‘Sakhaw zalenna leh ram leilung fate hamthatna humhalh’ tih thupui hmangin vantlang inkhawm koh a ni a. Congress party bakah PC leh ZNP aiawh an tel. Party president theuhten thu an sawi hnu ah resolution siamin, pawm tlan a ni a. Ziakin thawhhona thuthlung dah a ni bawk.
‘Mizoram Pradesh Congress Committee, Peoples’ Conference party leh Zoram Nationalist Party hian kan ramah sakhaw zalenna a lo awm theihna’n leh kan ram, kan hnam a lo him theihna’n kan thawkho a ni tih kan nemnghet e,’ tiin, Mizoram Secular Alliance dinnaah hian party pathum president ten an hming an ziahhnan a ni.
MPCC president Lalsawta chuan India rama sakhaw zalenna chungchangah Congress party chu a khaipa an nih angin, ram leilungfate hamthatna humhalh chungchanga hma latu nih chu an party tih tur tak a ni tih a sawi a. Thleibik nei loa party tin leh mipui chu hma la ho tura an sawm thu a sawi. NDA kaltlanga BJP la thawhpuitu MNF pawh he ‘Alliance’ ah hian an sawm thu sawiin, MNF-in BJP mit an tlun tawh loh avangin BJP thawhpui tumin ZPM-in theihtawp an chhuah thar ve leh thung niin a sawi bawk.
BJP sawrkar chu India rama sakhaw zalenna nuaibo tumtu an nih avangin state chhungah theihtawp chhuaha lo inven tum mah ila, pawnlam atanga beihna chu do hneh a har tur dawn tih Lalsawta hian a sawi a. 2024 Parliament inthlan turah sakhaw zalenna ngaipawimawhtu Congress party an tlin a ngaih tih a sawi bawk. India ram chu tunhma anga sakhaw zalenna ram a nih leh theihna turin Mizorama political party, kohhran leh NGO-te chu thawhho pui ah a sawm tih a sawi a ni.
PC president Vanlalruata chuan India ram chu Hindu sakhua lalnaa siam tum mek a ni a, Mizorama sakhaw thenkhatin Adhaar card an neih loh avanga an hamthatna tur hrang hrang an chang thei lo tih a sawi. An hamthatna an hmuh theihna turin Mizo mipui kan tanrual a ngai tih a sawi a. State sum dinhmun tha lo siamtha a, mipui hnena chanvo tha zawk pek chu sawrkar tha tih tur a nih angin, tun huna kan awmdan siamthaa hma la turin Pathianin min duh a, Secular Alliance hi a lo piang tih a sawi a ni.
ZNP president H Lalrinmawia chuan Mizoram dinhmun chhe tawh tak tundin nan a chhunga chengte kan tan tlan a, kan thawhho a pawimawh tih sawiin, BJP sawrkar chu sum hmatheha mipui vote lei thin an ni tih a sawi. Kan rama Hinduva a len zel lohna’n thawkho turin mipui a sawm a ni.
Party pathum kalkhawm din ‘Mizoram Secular Alliance’ resolution
“India rama BJP leh a thawhpuiten kum 2014 atanga sawrkarna an siam hnua Hindu lal ram din tuma hmalakna leh sawrkar laipui dan siam hmanga hnam tlem zawk leh tlangmi (tribal) te nek ral tuma hma lak mek hi ngawirenga thlirliam mai mai chi ah kan ngai loa. Hindu lal ram din tumna hian sakhaw tenau zawkte nekral tumna a kentel tlat avangin Kristian missionary-ten Chanchintha hrilna kawngah harsatna an tawk mek a, khawvel mithmuhah India ram hi Kristiante tana ram him lo langsar takah a chantir mek bawk. India ram hi sakhaw tenau zuitute leh hnam tlem zawkte tana ram nuam leh him a nih theihna atan BJP leh a thawhpuite chu hnawl ngam turin Mizoram Secular Alliance chuan Mizoram mipui kan ngen a. Hetihrual hian BJP sum chakna beiseilotu zawng zawngte chu kan ram, kan hnam leh sakhua a dam khawchhuah theih nan Mizoram Secular Alliance-ah hian lo tel turin kan sawm a ni,”