Serchhipah Quick Response Team din

Disaster Management & Rehabilitation Department Serchhip leh State Disaster Management Authority tangdun buatsaihin chhiatna thlen palha chhanchhuah hna thawktu tur Quick Response Team tan Thawhtanni khan training buatsaih a ni.
DM&R joint director Malsawmtluanga chuan district zawng zawngah Quick Response Team (QRT) tha taka kalpui tum niin, Serchhip district Aizawl pawna mumal taka QRT neihna hmasa tur a ni dawn tih a sawi. An hna chu sawrkar hna, a ngheta thawk an ni lo, tih rilru putna chi a ni lo tih vawng tlat tura chahin, “Sum leh paia hlawkna lam in ngaihtuah chuan in thawk rei peih loang, tuina tak tak leh inpekna nena thawh chi a ni a. Nunna thapa thawh a tul chang a awm fo dawn a, rilru leh taksa hrisel tak neih a ngai,” a ti.
DM&R deputy director Lalrokima Chenkual sawi danin, chhiatrupa a thlen changa chhanchhuah hna thawk tur sipaiin Quick Response Force an neih zulzuiin Quick Response Team hi State Disaster Management Authority-in a din a. Kum 2019 khan district zawng zawngah QRT din vek tura rel ni tawhin, a kalphung tur pawh duan a ni. Anmahni bakah an chhungte remtihna nen thlapa tih nise an duh a, chhanchhuahna hna an thawh laiin hliam tuar ve thei an nih avangin sawrkar atangin zangnadawmna pawh buatsaih sak an nih bakah district lama DM&R department-in insurance tihsak se an duh tih a sawi.