Shaboozey ‘A Bar Song (Tipsy)’ a la Hot ber

On Aug 21, 2024 23 0

Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart-ah hian a zawn lovin kar ruk a No.1 tling ta a, Post Malone ‘I Had Some Help’ featuring Morgan Wallen nih rualin, kumina he chart-a No.1 ni rei thei ber a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, ‘A Bar Song (Tipsy)’ hi kar khat chhungin stream maktaduai 33.3 leh sales 12,000 a la tling a, radio airplay-ah pawh ngaithlatu maktaduai 88.5 a la tling thei a, hei hi chart-ah a No.1 pui leh ta a ni.
‘A Bar Song (Tipsy)’ hi kar kalta khan Streaming, Airplay leh Sales chart-ah te a rualin a No.1 vek thei a, Hot 100 chart ranking siam nana tehna pathum chart-a tum khata No.1 ni vek thei hi hla dang 11 chiah a la awm a, ‘A Bar Song (Tipsy)’ hi tunkar-ah pawh heng chart pathumah hian a No.1 leh vek bawk a, 2017-a Louis Fonsi leh Daddy Yankee ‘Despacito’ featuring Justin Bieber hnua vawi khat aia tam heng chart pathuma a ruala No.1 ni leh thei hmasa ber a ni.
He chart-a kar ruk No.1 thei, Post Malone ‘I Had Some Help’ featuring Morgan Wallen chu No.2-ah bawk awm lehin, chart No.1 hlui tho Kendrick Lamar ‘Not Like Us’ pawh No.3-ah bawk a la awm a, Sabrina Carpenter ‘Espresso’ pawh No.4 a la ni.
Billie Eilish ‘Birds of a Feather’ chu No.7 atangin No.5-ah a insawn a, he hla hi 2024 Olympics closing ceremony-ah khan 2028 Olympics thlengtu tur USA-in boruak siam nan leh Olympics leh huna infiammi te welcome nana show an neihah Eilish hian a perform a, hei hian a hla hi a tilar thar lehzual a ni. Eilish hian he chart-a top 5 kai thei hla pali a nei tling ta a ni.
Chart No.2 pawh lo ni tawh Tommy Richman ‘Million Dollar Baby’ chu No.5 atangin No.6-ah a tawlh a, Chappell Roan ‘Good Luck, Babe!’ chu No.6 atangin No.7-ah a tawlh a, chart No.1 hlui Sabrina Carpenter ‘Please Please Please’ chu No.8-a bawk a la awm.
Chart No.1 hlui Teddy Swims ‘Lose Control’ chu No.9-ah bawk a la awm a, he hla hi chart top 10-ah kar 31 a lang tling ta a, chart top 10-a lan rei theihah pariatna a ni ta bawk.
Chart top 10 khartu chu chart No.1 pawh lo ni tawh Hozier ‘Too Sweet’ niin, No.10-ah bawk a la awm a, he hla hi Hot Rock Songs chart-ah chuan kar 20 a No.1 tling ta bawk.