Shaboozey ‘A Bar Song (Tipsy)’ a la Hot ber
Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart-ah hian kar kua a No.1 tling ta a, kumina he chart-a No.1 ni rei thei ber a la ni. He hla hi Shaboozey tan he chart-a a hla No.1 kai thei hmasa ber a ni a, July thla atang khan a rawn No.1 tan tawh a ni. Hetihrual hian Sabrina Carpenter pawhin chart top 5-a lang thei hla pathum a kar hnih nan a rawn nei ve leh bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
Shaboozey ‘A Bar Song (Tipsy)’ hian radio airplay ngaithlatu maktaduai 77.9 a la nei thei a, stream maktaduai 29.8 leh sales 10,000 a la tling bawk a, hei hi chart-ah a No.1 pui leh ta a ni.
Chart No.1 hlui Post Malone ‘I Had Some Help’ featuring Morgan Wallen chu No.5 atangin No.2 a kai thar leh a, Sabrina Carpenter hla hit ‘Espresso’ chu No.4 atangin No.3 a kai thar leh a, Sabrina hla dang, he chart-a No.1 pawh lo ni tawh ‘Please Please Please’ chu No.3 atangin No.4-ah a tawlh a, a hla dang ‘Taste’ chu No.2 atangin No.5-ah a tawlh ta bawk.
He chart top 5-a lang Sabrina hla pathum te hi a No.1 album ‘Short n’ Sweet’ a hla te an ni a, heng hla pathumte hi he chart-a a hla lang theih neih chhun te an ni bawk a, zaithiam zinga chart-a hla lang thei neih hmasak pathum top 5-a lan pui vek thei pahnihna a ni a, heng hla pathum te hi kar kalta chart-ah khan top 5-ah an lo lang vek tawh bawk a, heti hian soloist zingah he chart-a hla lang thei an neih hmasak pathum chin kar khat aia tam top 5-a lan pui vek thei hmasa ber a ni ta a ni. Soloist ni loah pawh hetiang tithei awm chhun chu The Beatles chiah an la awm.
Lady Gaga leh Bruno Mars ‘Die With a Smile’ chu No.6-ah bawk awm lehin, Billie Eilish ‘Birds of a Feather’ pawh No.7-ah bawk a la awm a, Chappell Roan ‘Good Luck, Babe!’ pawh No.8-ah bawk la awmin, chart No.1 hlui Teddy Swims ‘Lose Control’ chu No.10 atangin No.9-ah a insawn leh hret a, chart No.1 hlui Kendrick Lamar ‘Not Like Us’ chu No.9 atangin No.10-ah a tawlh ve thung.