Sheikh Hasina diplomatic passport hnuhkir sak

Bangladesh interim government chuan premier hlui Sheikh Hasina diplomatic passport chu a hnawlsak a. Sheikh Hasina hi zirlai te kaihhruaia lungawilohna lantirna nasa tak kalpui hnuah Bangladesh chhuahsanin India ramah a tlanchhia ni.
Interior ministry chuan thuchhuah a siamah Hasina mai bakah sorkar hluia minister leh ex-lawmaker te diplomatic passport chu hnuhkir vek a ni tiin an sawi a.
Bangladesh buaina avangin mi 450 chuangin nunna an chan a, heng nunna chan te hi police te chetlakna vang a ni deuh ber a. Hasina erawh nawrchhuah niin Dhaka-a a official residence chu luhchhuahin a awm a ni.
August 22 khan United Nations team te chuan Bangladesh lutin kum 15 chhung Hasina in rorelna a lekkawh hnuah a sorkar paihhtlak a nih theih nana chetlaknaah human rights bawhchhiatna a awm em tih te an enfiah dawn a ni.
“Prime Minister hlui, a adviser, cabinet hlui leh national assembly thiah taka member tin te chuan an dinhmun avangin diplomatic passport nei thei vek an ni a. Mahse, an post chelh atanga ban emaw chawlhtir emaw an nih tawh chuan anmahni leh kawppui te nen lam an diplomatic passport chu hnuhkir nghal a ni” tiin ministry thuchhuah chuan a tarlang.
Hasina sorkar kha opposition te hmehmih an nih theih nana mass detention te bakah nghaisakna kalpui te, an chin hriatloha dahbo te nasa taka kalpuia puhin a awm a ni.
Dhaka a thuneitu thar te chuan Hasina leh a top official hlui te chuan an duh chuan standard passport an dil thei ang tia sawiin, mahse chu chu thuneitu tena an enfiah hmasak phawt a ngai dawn a ni an ti bawk a.
Passport an dil a nih pawhin security agencies pahnih ten an enfiah hnuah chauh pawm tur a nih leh nihloh tihchian a ni chauh dawn a ni tiin ministry thuchuah chuan a tarlang bawk a.
Hasina chuan Bangladesh a buaina chhuah hnuah a thian tha India Prime Minister Narendra Modi belbulin India ramah a lut a. India sorkar BJP tena an kaihhruai mek chuan Hasina party Bangladesh Nationalist Party te chu thlawpin Islamic group te aiin an hnaih zawk a ni.
India chuan Sheikh Hasina a thleng mek chungin Modi chuan Bangladeshi leader Nobel laureate Muhammad Yunis kaihhruai caretaker sorkar chu an thlawp thu an sawi thung.