Siaha-ah sikret bawm 2712 tiral

Legal Metrology, Mizoram Police leh Anti Tobacco Squad Siaha chuan Siaha khawpui chhunga dan phal loh – contraband cigarettes zawrh an man chu Thawhlehni khan DC Complex Siaha-ah Anti Tobacco Squad Siaha chairman, bawrhsap VL Hruaizela Khiangte chuan a tiral.
ATS chairman chuan chhiah chawia zuar an awm laia chhiah pawh chawi loa thil zawrh a ni chu pawi a tih thu a sawi a. Meizial zuk chu mihring tan a hrisel loh bakah a zutu bula awm zu ve lote tan a hrisel lo, tiin, nghei thei chuan nghei theuh tum turin a chah.
Tun tuma cigarettes tichhiat hi dawrkai pali hnen atanga man niin, tualchhung zawrhna rate-a chhutin Rs. 1,62,720.00 hu a ni. Kum 2021 khan district magistrate hriatpuiin Lawngtlai leh Siaha khawpui atanga man Valiant cigarette leh Far Star cigarette bawm 4810 chu tichhiat a lo ni tawh a. TUn tumah hian V cigarette bawm 2112 leh Farstar cigarette bawm 600, a vaiin bawm 2712 tihchhiat a ni.
Legal Metrology Siaha hotute sawi danin, vaihlo man a nih danah leh tiral turin dan fel tak a awm a. Tun tum ami hi kumin March 21-a man daih tawh ni mah se, tiral tur chuan man atanga ni 60 ral hnuah phalna lak phawt a ngai a; Legal Metrology controller-in phalna a pek hnuah district magistrate awmlai ngeia tihral tur a nih angin, tunah pawh district magistrate/ bawrhsap hoa tihral a ni.
Vaihlo tihral hi ‘environment friendly’ thei ang bera tiral tura thupek dawn a nih angin, a bawm atanga lakchhuah vek hnuah khawl (sprayer) hmangin a zawpral thleng tuia phuh huh an ni a, bawlhhlawh paihna hmunah paih nghal a ni.